“The Washington Post” gazetı bastırğan Pentagon dokumentına qarağanda, saqlanu ministrı urınbasarı Stiv Faynberg saqlanu sänäğate şirkätläre citäkçelärenä yazğan xatında möhim xärbi qorallarnı cîteşterü häm kiterü protsessların tizlätüne taläp itkän.
Faynberg kompaniyälärdän 21 kön êçendä Pentagonğa "küpkä tizräk häm agressivraq täêmin itü grafikların" buldıru yäki möhim mömkınlektärne cîteşterüne arttıru öçen plannar täqdim itülären sorağan.
Faynberg, şulay uq, saqlanu kompaniyälärennän cîteşterü quäten arttıru öçen konkret investitsiyälär häm qorılmalarnı kiñäytü plannarın täqdim itülären teläde.
İran belän suğışta qorallar zapası betkän.
AQŞ suğışnıñ berençe ayında 850dän artıq “Tomahawk” raketası, 1000nän artıq “Patriot” häm “Terminal High Altitude Area Defense” (THAAD) sistemaları qullanğan, şulay uq, 1300dän artıq taktık ballistik raketa atqan diyelä.
Strategik häm xalıqara tikşerenülär üzäge (CSIS) analizına qarağanda, suğışqa qadär yaqınça 2200 bulğan global “Patriot” raketa zapası 827dän tübänräk töşkän, ä THAAD raketa zapası 452 bulğan häm 278dän dä kimräk qalğan.
AQŞ Saqlanu ministrlığı aprel ayında “Boeing” häm “Lockheed Martin” kompaniyäläre belän möhim raketa komponentların cîteşterü quäten öç tapqır arttıru turında qısa kileşüenä ireşüen citkerde.
