“Dawn” gazetınıñ comğa könge xäbärenä qarağanda, Xayber- Paxtunxva provinśiyäsendä suğışçılarğa qarşı alıp barılğan êzläw häm höcüm operaśiyäsendä kim digändä 7 iminlek xezmätkäre hälaq bulğan, 13 xezmätkär yaralanğan.

Cirle poliśiya wäqalät mäydanındağı tawlı töbäktä suğışçılar iminlek konvoyına tozaq qorğannan soñ köçle qorallı bäreleş kilep çıqqan, näticädä 1 ğaskärineñ yugaluı da xäbär itelgän.

Yaralanuçılar xastaxanägä kiterelgän, operaśiya däwam itkän töbäkkä zur poliśiya köçe urnaştırılğan.

İminlek köçläre suğışçılarğa zur yuğaltular kiterülären belderügä qaramastan yuğaltuları turında centekle mäğ’lümat yuq.

İlbaşı Asıf Ali Zärdari häm prem’yer-ministr Şahbaz Şärif iminlek köçlären 19 suğışçını ütergän uñışlı operaśiya öçen qotlap, ğäskärilärneñ batırlığın häm professional’legen maqtağan.

Zärdari: "Paqıstan terrornı tulısınça beterüdä qatğıy", – dip beldergän.

Şärif iminlek köçläreneñ Xayber- Paxtunxva provinśiyäseneñ Moxmand, Tön’yaq Väziristan häm Bannu rayonnarında uñışlı operaśiyälären maqtap, terrorğa qarşı köräşneñ terror ildä tulısınça beterelgänçe däwam itäçägen citkergän.

Bu waqıyğalar Paqıstan armiyäseneñ pänceşämbe könne ilneñ tön’yaq-könbatışında soñğı ike kön êçendä ütkärelgän ayırım operaśiyälärdä 19 şikle suğışçınıñ üterelüe turında yasağan belderüennän soñ bulğan.

 Paqıstanda soñğı yıllarda iminlek köçlärenä qarşı höcümnär arttı häm ul bu höcümnär öçen çığışı belän Äfganstannan bulğan  “Tehrik-e-Taliban Paqıstan” (TTP) suğışçıların ğäyepli.

Qabul isä älege ğäyepläwlärne kire qağa.