Uñçı kandidat Laura Fernandes, kokain säwdäse belän bäyläneşle artqan köç qullanuğa qarşı qatı köräşäçägen wäğdä itep, Kosta -Rika ilbaşı saylawlarında zur östenlek belän ciñde.

Tawışlarnıñ 88.43%ı sanalğanda Fernandes Delgado 48.51% belän iñ yuğarıda bara. Ul ber millionnan kübräk keşeneñ tawışın alğan. Uñçı qanat kandidatı qanun buyınça kiräkle 40%lı çikne uzıp, saylawnı berençe turda otaçaq.

İkençe urında baruçı Alvaro Ramos 33.32% däräcäsendä qaldı, ä Liberal' partiyä 750 meñ 585 tawış aldı.

İlbaşı bulu öçen 20 kandidat köräşkän ide, ämma tögäl bulmağan näticälärgä qarağanda, Fernandes häm Ramos tışında beräw dä 5%qa citmäde.

Kürşelär häm berlektäşlär, äytik Salvador ilbaşı Nayib Bukele, älegä ciñüe räsmi räweştä iğlan itelmäsä dä, Fernandesnı qotladı.

"Min äle genä telefon aşa Kosta - Rikanıñ saylanğan ilbaşı Laura Fernandesnı qotladım. Aña idaräsendä zur uñışlar telim häm qaderle qardäşebez Kosta - Rika xalqına iñ yaxşı teläklärne citkeräm," dip yazdı Bukele “X” platformasında.