Törkiyä Cömhüriyäte ilbaşı Räcäp Tayyip Ärdoğan, üsep baruçı töbäk bäreleşennän Törkiyäne yıraq totunıñ xökümätneñ iñ möhim östenlege buluın äytte häm ilne suğışqa êtärüne maqsat itep quyğan provokaŝiyälärgä qarşı kisätte.

Ärdoğan, comğa könne yasağan belderüendä: "İlebezne bu ut çoqırınıñ tışında totu — bezneñ iñ zur östenlegebez," — dide. Änkara citäkçelegeneñ Törkiyäne suğışqa cälep itüne maqsat itkän plannar, tozaqlar häm provokaŝiyälär qarşında zur iğtibar belän xäräkät itüen assızıqladı.

Bu belderü, İranğa yünältelgän höcümnär häm İrannıñ cawap itep qaytarğan höcümnärennän soñ töbäktä kierenkelek artqan çorda yasaldı. NATO, İrannnan Törkiyägä taba atılğan öçençe raketanı da totqarladı.

Ärdoğan, Törkiyäneñ üz cirlärenä yünältelgän qurqınıçlarğa qarşı kiräkle adımnar yasawın häm hawa kiñlegen saqlawnı däwam itäçägen äytte.

Törkiyäneñ hawa kiñlegen bozuçı barlıq qurqınıçlarğa qarşı kiräkle çaralar kürüen, kiçä tönlä dä bulğanı kebek, xäräkätkä kereşüen belderde.

Mäzhäb kiyrenkelege turında kisätü

Ärdoğan, däwam itüçe krizis waqıtında mäzhäb häm êtnik kiyerenkelekne qabızıp cibärügä yünälgän omtılışlarğa qarşı watandaşlarnı iğtibarlı bulırğa çaqırdı.

İlbaşı üzgärüçe geosäyäsi moxitnıñ Törkiyäneñ tağın da tizräk häm strategik räweştä xäräkät itüen taläp itüenä dä basım yasadı.

"Yaña däwergä keräbez. Bu däwerdä tizräk xäräkät itärgä tiyeş bez, citez buluıbız kiräk ", — dide.

Keşelek vöcdanı

Ärdoğan şulay uq Ğazzä mäs’äläsendä xalıqara cämäğatçelekneñ saylap qına kürsätkän reakŝiyälären tänqıytläde.

Qayber illärneñ zolımğa häm genoŝidka küz yomuın, ä qayberläreneñ isä qırıslıq kürsätüçe yaqlarnı açıqtan-açıq yaqlawın äytte.

"Yätim qalğan fälästinle häm süriyäle balalar kiçergän qayğı-xäsrätlärne qaldırıp, yalğız qalğan pingvinnı qızğandılar", — dide.

Ärdoğan, vöcdan krizisı bulğan dönyada Törkiyäneñ keşelek vöcdanı buluı öçen köräşülären dä belderde.