Kreml’ Rusiyä däwlät başlığı Vladimir Putin­nıñ comğa könne Mäskäwdä İran­nıñ iñ yuğarı iminlek oyışması räise­n qabul itüen xäbär itte.

Oçraşu AQŞ ilbaşı Donal’d Tramp­ İran­nı atom -töş programması buyınça kileşügä mäcbür itärgä tırışqan çorda uzdı.

Kreml’neñ internet säxifäsendä bastırılğan belderüdä: “Däwlät başlığı Rusiyägä kilgän İran İslam Cömhüriyäte Yuğarı milli iminlek şurası särqatibe Ali Laricaninı Kreml’dä qabul itte”,- diyelde.

Tramp, comğa könne irtänge säğat’lärdä yasağan belderüendä, Rusiyäneñ yaqın berlektäşe bulğan İran­nıñ xärbi tıqşınudan qaçu öçen atom – töş  programması buyınça kileşü tözergä teläwenä ışanuın äytte.

AQŞ ilbaşı şulay uq küptän tügel protestçılarnı bastırğan İranğa xärbi höcüm belän yanawın yañarttı.

İran­nıñ Mäskäwdäge ilçelege sośial’ mediada Putin belän Laricani arasındağı söyläşülärneñ iq’tisadi mönäsäbätlärgä, möhim regional’ häm xalıqara mäs’älälärgä bağışlanuın belderde, ämma centekle mäğ’lümat birelmäwen citkerde.

Rusiyä däwlät xäbär agentlığı “RIA Novosti” citkergänçä, bu säfär turında aldan xäbär itelmägän ide.

Mäskäw Vaşington belän Tähran arasında aradaşçılıq başqarırğa täq’dim itä.