Livan millî xäbär agentlığı “NNA” mäğlümätlärenä kürä, comğa könne irtän Livannıñ könyağındağı Xanuiye rayonında urnaşqan aşığıç yärdäm üzägen maqsat itep alğan İzrail hawa höcümendä dürt keşe hälaq bulğan.
İzrail xärbi oçqıçı rayondağı İslam sälamätlek saqlae idaräsenä bäyle ber urınğa höcüm itte, dürt keşeneñ ğomeren özde häm ike mediśina xezmätkären yaraladı.
Agentlık Sıddıkin häm Kana rayonnarı arasındağı Xafur töbägen maqsat itep alğan höcümdä tağın öç keşeneñ yaralanuın citkerde.
Höcüm, İzrailneñ hawadan höcüme näticäsendä Tebnine rayonındağı ber xastaxanägä zur zıyan kitergännän soñ ber kön ütkäç bulğan.
“NNA” xäbärenä kürä İzrail xärbi oçqıçınıñ Tebnine xastaxanäse tirä-yağın bombalawı näticäsendä ike keşe ülgän häm ber keşe yaralanğan.
Livan sälamätlek saqlaw ministrlığı açıqlağan mäğlümätlärgä kürä, 2 marttan birle İzrailneñ Livandagı höcümnärendä kim digändä 16 xastaxanä zıyan kürgän.
Räsmi mäğlümätlär şunı da kürsätä: şul uq çorda mediśina xezmätkärlären häm aşığıç yärdäm törkemnären maqsat itkän höcümnärdä kim digändä 116 keşe yaqtı dönyadan kitkän häm 263 keşe yaralanğan.
Livan räsmi zatları beldergänçä İzrailneñ martta başlanğan höcümnärendä kim digändä 3 meñ 89 keşe hälaq bulğan, 9 meñ 397 keşe yaralanğan häm 1 million 600 meñnän artıq keşe üz urınnarınnan kitärgä mäcbür bulğan.
