Volın ölkäse gubernatorı Roman Romanyuk pänceşämbe könne Ukraina-Polşa çigenä yaqın Volında 370 meñ keşeneñ Rusiyäneñ dron höcümnäre näticäsendä êlektrsız qaluın, çit il investitsiyäläre nigezendä êşläwçe obyektqa höcüm yasaluın häm ike keşe yaralanuın belderde.

Milli politsiya köçläre Ukraina üzäğendäge Uman şähärendäge küpfatırlı yortqa dron höcümendä tağın biş keşe yaralanuın citkerde.

Polşa Qorallı Köçläre höcümnär waqıtında hawa kiñleklären saqlaw öçen xärbi oçqıçların hawağa kütärgän. Soñraq yasalğan belderüdä hawa kiñlegen bozu oçraqları bulmawı citkerelde.

Ênergetika asqormasına yaña höcümnär

12 oktyabrdä Ukraina xökümäte, AQŞ ilbaşı Donald Trampnıñ Mäskäw häm Kiyevnıñ ênergetika asqormasına höcümnärne tuqtatu turında kileşülären iğlan itüenä qaramastan, Rusiyäneñ Xarkovtağı êlektr stantsiyäsen utqa totuın belderde.

Ukraina ilbaşı Volodimir Zelenskiy täqdim itelgän utnı tuqtatunı xuplawın, läkin Rusiyäneñ kileşüne ütäwen kürsätüçe bernindi dälil kürmäwen äytte. Zelenskiy Vaşingtonnı täqdim itelgän utnı tuqtatunı ütäw öçen Mäskäwgä basım yasarğa çaqırdı.

Kreml, bernindi kileşüne raslamıyça, yaqlar arasındagı êlemtälärneñ däwam itüen belderde.