Törek şirkätenä qarawçı köymä Ukrainadağı Çernomorsk portına Rusiyädän yasalğan höcümdä zıyan kürgännän soñ Törkiyä borçuların belderde. Bu waqıyğa suğışnıñ Qara diñgezgä taralaçağı turında aldan yasalğan kisätülärneñ xaqlı buluın tağın ber tapqır kürsätä diyelde Törkiyä tışqı êşlär ministrlığı belderüendä.
Ministrlıq, başlanğıç mäğlümatlarga kürä, köymädä bulğan êkipaj äğzaları häm yök maşinaları yörtüçeläreneñ êvakuatsiyälänüen citkerde. Törkiyä watandaşları arasında zarar kürüçe bulmağan. Odessadağı Baş konsullıq xälne yaqınnan küzätä häm vatandaşlarga kiräkle yärdämne kürsätä.
“Bu waqıyğa uñayınnan, Rusiyä belän Ukraina arasındagı suğışnı tiz arada tuqtatu möhimlegen qabat äytäbez,” - diyelä belderüdä.
Ukraina matbuğatı citkergän xäbärlärgä kürä, Rusiyä Odessa töbägenä ballistik raketa häm dron belän höcüm yasadı, berniçä urında şartlawlar buldı häm hawa saqlanu xezmäte aktivlıgı arttı.
Rusiyä ilbaşı Vladimir Putin uzğan atna Mäskäwneñ Ukraina portlarına höcümnären arttıraçağın häm, ägär Rusiyä tankerlarına höcümnär tuqtalmasa, Ukrainağa yärdäm itüçe illärneñ köymälärenä dä ataçaqların äytte.
