Törkiyä, AQŞ häm İzrailneñ İranğa qarşı höcümnäre däwam itkändä Yaqın Könçığışta artqan kiyerenkelekneñ böten töbäkkä cäyelä alaçağın kisätep, diplomatiyägä yañadan iğtibar birergä çaqırdı.

Törkiyä Cömhüriyäte Milli saqlanu ministrlığınıñ Matbuğat häm xalıq belän mönäsäbätlär kiñäşçese kontr-admiral Zäki Aqtürk atnakiçen yasağan belderüendä İzrail häm AQŞnıñ İranğa qarşı höcümnäre belän başlanğan, İrannıñ İzrailğa qarşı cawap qaytaruı häm Farsı qultığındağı AQŞ xärbi häm finans aktivlarına höcüm itüe belän köçäygän suğışnıñ tağın da kiñräk töbäkkä cäyelüe qurqınıçınıñ däwam itüen iskärtep uzdı.

Kontr-admiral Aqtürk: "Böten kileşmäwçänleklär xalıqara xoquq nigezendä, dialog häm diplomatiya aşa xäl itelergä tiyeş”, - diyep: "Bu yünäleştäge täwäkkäl totışıbız häm bu ölkädäge tırışularıbız däwam itä. Bez töbägebezneñ tınıçlığına häm totrıqlılığına zıyan kiterä torğan nizağlarnıñ mömkin qädär tizräk tämamlanuına ömetlänäbez", - dip belderde.

İzrailneñ küp frontlı höcümnärenä gäyepläw

Kontr-admiral Aqtürk Livan, Süriyä häm Fälästin belän bergä bik küp frontta däwam itüçe İzrail xärbi höcümnären dä gäyepläde. İzrailneñ Livandağı höcümnäreneñ xalıqara xoquqnı häm humanitar xoquqnı bozuına basım yasawçı Aqtürk bu höcümnärneñ BMO tınıçlıq köçe personalınnan 3 keşeneñ ülemenä säbäp buluın xäterlätte.

Aqtürk monnan tış İzrailneñ Süriyäneñ könyağına qarşı höcümnäre belän bu ilneñ "möstäqillegen häm cir bötenlegen” bozırğa däwam itüen, İordan yılğasınıñ yaw astındağı könbatış üzänlegendä "qanunsız toraq punktlar êşçänlegen” däwam itüen häm Ğazzägä qarşı höcümnäreneñ dä däwam itüen belderde.

BMOğa çaqıru: "Cawaplılıqnı üz östegezgä alığız"

Xalıqara cämäğätçelekne çaralar kürergä çaqıruçı kontr-admiral Aqtürk: "Xalıqara sistemanıñ legitimlığına häm xalıqara xoquqqa qarata ışanıçqa tağın da zıyan kitermäs öçen Berläşkän Millätlär Oyışması belän bergä böten xalıqara cämäğätçelekne İzrailneñ bu agressiyäseneñ totqarlanıluı öçen cawaplılıqnı üz östenä alırğa tağın ber qat çaqıram”, - dip äytte.