Törkiyä wäqalätleläre mäğlümatlarına kürä, Ägäy diñgezendä Bodrum şähäre yanında qaçaqlar utırğan köymä batıp, kim digändä, 14 keşe häläk bulğan.

Qotqaru operatsiyäse, comğa könne Mugla vilayätendäge Bodrumnıñ Ortakent töbägendä qaçaqlar utırğan köymäneñ batuı turında xäbär alınğaç, başlatılğan.

Qotqaru êşlärenä 4 Törkiyä Yar buyı saqçısı köymäse, suğa çumu törkeme, ber boralaq häm berniçä qotqaru törkeme cälep itelgän.

Operatsiyä barışında Yar buyı saqçıları tarafınnan batuçı ike qaçaq qotqarılğan.

Mugla gubernatorlığı xäbär itkänçä, comğa köndez “112” Aşığıç xezmät üzägenä Bodrumnıñ Ada Burnu töbägendä ber Äfğanstan watandaşı yärdäm sorap möräcäğät itkän.

Xäbärdän soñ 4 Yar buyı saqçısı köymäse häm suğa çumu törkeme cibärelgän.

Yärdäm sorawçı keşeneñ süzlärenä qarağanda, alar Bitäz töbägennän 18 keşe utırğan rezin köymädä yulğa çıqqannar.

Yulğa çıqqannan soñ 10 minut uzğaç, köymä su ala başlağan häm batqan.

Älege keşe yaqınça altı säğät buyı yarğa qadär yözelep barğan, bu isä êzläw häm qotqaru operatsiyäsen başlawğa säbäp bulğan.

“Operatsiyälärgä östämä yar buyı saqçısı köymäläre häm boralaq cälep itelde. Êzläw näticäsendä ike keşe qotqarıldı, şularnıñ berse Çäläbi utrawına üze yözelep barıp citkän,” dip äytelä belderüdä.

“14 qaçaqnıñ mäyetläre tabıldı. Êzläw häm qotqaru êşläre däwam itä, Yar buyı saqçıları 4 köymä, suğa çumu törkeme häm boralaq yardämendä êşli,” dip östädelär.