2025 yılğı Nobel Tınıçlıq büläge Venesuêla oppozitsiya liderı Maria Korina Maçadoğa birelde, dip xäbär itte Norvegiyä Nobel komitetı comğa könne.
AQŞ ilbaşı Donald Tramp üzen bu büläkkä iñ layıqlı itep kürsätsä dä, 58 yäşlek Maçado Venesuêla xalqınıñ demokratik xoquqların yaqlap armıy-talmıy êşläwe öçen büläklände.
Bıyılğı büläkkä barlığı 338 kandidat täqdim itelgän ide, şularnıñ 244e şäxes, ä 94e - oyışma.
Uzğan yıl Nobel Tınıçlıq büläge “Nihon Hidankyo” törkemenä birelde. Bu Yaponiyada atom bombası şartlawlarınnan isän qalğan keşelär oyıştırğan xalıq xäräkäte. Alar atom qoralların qullanırğa yaramawın şahitlärneñ süzläre aşa kürsätüläre öçen büläklände.
1901nçe yıldan 2024nçe yılğa qadär Nobel Tınıçlıq büläge 105 tapqır birelgän, barlığı 142 laureat, şularnıñ 111e şäxes, ä 31e - oyışma.
Barlığı 28 törle oyışma Nobel Tınıçlıq bülägen alğan, şular arasında Xalıqara Qızıl Xaç Komitetı - öç tapqır, ä BMO Qaçaqlar Agentlığı (UNHCR) ike tapqır büläklängän.
Nobel büläkläre Şwetsiyä uylap tabuçısı Alfred Nobel vasıyäte nigezendä 1901nçe yılda berençe tapqır birelä häm bügen dönyanıñ iñ abruylı büläklärennän berse sanala.
Büläklär fizikada, ximiyada, meditsina yäisä fiziologiyädä, ädäbiyättä häm tınıçlıq ölkäsendä här yıl birelä, ä iqtisad büläge 1969 yılda Şwetsiyä üzäk bankı tarafınnan östälgän.
