Fransiya İlbaşı Êmmanuel Makron livanlı ministr da qatnaşqan çarada İzrailgä yünältelgän yullama yasadı häm "basıp alunıñ" iminlek kitermäwen äytte.
Makron Ğaräp dönyası institutında ber kürgäzmäneñ açılışında yasağan çığışında: "Hiçber basıp alu, hiçber koloniyäläşterü töre — monda da, Yordannıñ basıp alınğan Könbatış üzänlegendä dä, başqa teläsä-qaysı cirdä dä — berkemneñ iminlegen täêmin itä almayaçaq",- dide.
Makron bu belderüne Livan mädäniyät ministrı Gassan Salamé belän bergä bulğanda häm İzrailneñ Livanğa qarşı suğış açqan ber çorda yasadı.
Livanğa qarşı hawa höcümnäre oyıştırğan İzrail, soñraq armiyäseneñ qorı cir berämleklären Livannıñ könyağına cibärde häm monı "çiklängän" ber höcüm bularaq bäyäläde.
Livanlı räsmi zatlarğa qaraganda, İzrailneñ höcümnäre 1000nän artıq keşeneñ ülüenä säbäpçe buldı.
Yordannıñ basıp alınğan Könbatış üzänlegendä İzrail köç qullanuı
28 fevral’dä AQŞ belän İzrailneñ İranğa qarşı suğışı başlanğannan birle Yordannıñ basıp alınğan Könbatış üzänlegendä İzrail höcümnärendä, kimendä, altı fälästinle üterelde. Töbäktäge qayber binalar häm avtomobillär isä qanunsız İzrail kilep urnaşuçıları tarafınnan yandırıldı.
Makron, xalıqara xoquqqa xörmät kürsätelüenä çaqırıp: "Qayber keşelär bezne iminlekneñ tik xätär kürşene basıp alıp ğına täêmin itelä alaçağına ışandırırğa telägän ber waqıtta, Livan bezgä ber genä närsäne xäterlätä: ğomumkeşelekneñ köçe,"- dide.
İkençe yaqtan, Parijdağı kürgäzmä bezneñ êrağa qqadär 6900 yıldan birle toraq punkt bulğan häm dönyanıñ iñ borınğı portı bularaq qabul itelgän Livandagı Biblos şähärenä qarawçı törle arxeologik qaldıqlarnı täqdim itte.
