Dönyada küp kenä illär pänceşämbe könne, xantavirus awıruınıñ tağın da kiñräk taraluın buldırmaw maqsatınnan, kizü başlanğan yulçı köymäsennän Kabo-Verde utrawları sulıqlarına barğançı uq annan töşkän keşelärne barlıy başladı.

“MV Hondius” korabında başlanğan kizüdä öç keşe (Niderlandlı par häm ber Germaniya watandaşı) wafat buldı. Bötendönya sälamätlek saqlaw oyışması mäğlümatları buynça, ber Şveytsariya watandaşın da kertep, sigez keşeneñ virus yoqtıruınnan şöbhälänälär.

Niderland xökümäte çarşämbe könne, kizü turında xäbär itelgänçe, köymäneñ Kabo-Verdeğa yulı uñayınnan Santa-Xelena portında yaqınça 40 yulçınıñ töşüen belderde.

Bu yulçılarnıñ kübeseneñ xäzerge waqıtta qayda buluı älegä bilgele tügel.

Korabtan töşüçelärneñ berse — 11 apreldä köymädä wafat bulğan Niderland ir-atınıñ xatını. Xatın da awırıy başlıy häm Niderlandqa barıp citä almıyça wafat bula

Niderlandnıñ KLM aviakompaniyäse çärşämbe könne yasağan belderüendä, xatınnıñ sälamätlege naçarayuı säbäple, 25 apreldä Yoxannesburgta oçqıçqa kertelmäwen äytte.

Wafat bulğan keşelärdäge virusnıñ, keşe arasında bik yaqın mönäsäbät aşa tarala ala torğan And törkemenä qarawı raslandı.

Belgeçlär, virusnıñ bu räweşle yoğuı bik siräk oçraq buluın assızıqladı, läkin bu kizü sälamätlek saqlaw wäqalätlelären yuğarı xäwef xälenä kiterde.

AQŞnıñ Awırularnı küzätü häm profilaktika üzäge çärşämbe könne köymädä bulğan AQŞ watandaşları belän bäyle wazğıyätne iğtibar belän küzätülären belderde häm xäzerge waqıtta Amerika xalqı öçen xäwefneñ bik tübän buluın citkerde.

Fransiya tışqı êşlär ministrı Jan-Noel Barro pänceşämbe könne ber Fransiya watandaşınıñ awıru keşe belän mönäsäbättä buluın, läkin xäzerge waqıtta bernindi simptomnar da kürenmäwen äytte.

Argentina sälamätlek saqlaw ministrlığı kruiz köymäseneñ quzğalu noktası bulğan Uşuaya şähärendä kimerüçelärne totu häm analizlaw êşlären başqaraçağın iğlan itte.

Yaqınça 150 keşene utırtqan “MV Hondius” köymäseneñ şimbä könenä qadär İspaniyäneñ Kanar utrawlarındağı Tenerife portına barıp tuqtaluı kötela.

Tenerifeğa barıp citkäç, sälamät bulğan häm İspaniyä watandaşı bulmağan barlıq yulçılar üz illärenä cibäreläçäk, ä 14 İspaniyä watandaşı Madridtağı xärbi xastaxanädä karantinga alınaçaq.

Çarşämbe könne köymädän öç awıru êvakuatsiyälände. Alarnıñ berse Niderland xastaxanäsenä salındı, ikençese meditsina yardäme öçen Germaniyağa ozatıldı.

Öçençe awırunı alğan oçqıç kütäreler aldınnan, xastanıñ yäşäw täêminatı sistemasındağı problemalar arqasında totqarlıq bula. Oçqıç pänceşämbe könne irtän Niderlandqa barıp citä.