Törkiyä ilbaşınıñ xäläl cefete Äminä Ärdoğan "Totrıqlı üseş 2030 maqsatları"nıñ härkem öçen tigez mömkinleklär tudıruçı dönya idealı buluın, häm monıñ tormışqa aşuı öçen här ilneñ cawaplılıq aluı zarurlığın äytte.
Bu süzlär İstanbulda "Qaldıqsız tormış" waqıfı tarafınnan Törkiyäneñ Tirä-yaq moxitnı saqlaw, şähär tözeleşe häm klimat üzgäreşe ministrlığı, İgençelek häm awıl xucalığı ministrlığı, BMOnıñ Êkologiya programması häm BMO-Habitat xezmättäşlegendä oyıştırılğan "Qaldıqsız tormış" forumınıñ ministrlar utırışında yañğıradı. Forumnıñ teması "Keşelär, urınnar, üseş” buldı.
Bu maxsus utırışnıñ qaldıqsız tormış vizionın urtaqlaşu, fiker alışu häm kiläçäkkä qarap urtaq adımnar yasaw öçen möhim forsat buluına ışanuın beldergän Äminä Ärdoğan Törkiyäneñ tirä-yaq moxit, şähär tözeleşe häm klimat üzgäreşe ministrlığı koordinaŝiyasendä törle tırışlıqlar başqaruın äytte.
Törkiyäneñ däwlät oyışmalarınnan alıp cirle xakimiyätlärgä, şäxsi tarmaqtan alıp ictimağıy cämğiyätkä qadär köçle teläktäşlek mädäniyäte tudıruın assızıqladı ul häm añ-fikerne üsterügä qarağan çaralarğa iğtibar birülären äytte.
Şulay uq, bu barışta xatın-qızlarnıñ zur yärdämen häm tirä-yaq moxit mäsälälärendä alarnıñ ni qädär möhim buluın kürülären belderde.
Törkiyäneñ soŝial platforması “NSosyal”dä ministrlar utırışı turındağı yazmasında Ärdoğan bolay dide: "Törkiyä klimat häm tirä-yaq moxit mäsälälären xäl itü öçen xalıqara xezmättäşlekne nığıtuğa häm urtaq maqsatlar bilgeläwgä zur ähämiyät birä. Bu cıyılış ğadellek nigezendä yökne urtaqlaşuğa qarağan strategik partnyerlıklar başlatu öçen platforma bulır häm uñışlı näticälär kiterer dip ömetlänäm.”
