AQŞ ilbaşı Donal'd Tramp genośidçı Netan’yaxunıñ uzğan atnada Qatarğa höcüm yasar aldınnan anı şäxsi räweştä xäbärdar itüe turındağı xäbärlärne kire qaqtı.
Tramp düşämbe könne: “Yuq, alar mondıy êş êşlämädelär”,- dide.
Höcümnär turında niçek belgäne soralğaç isä: “Sez niçek öyrängän bulsağız, min dä şulay beldem”,- dip cawap birde.
Bu belderü Netan’yaxunıñ höcüm aldınnan Trampnı xäbärdar itkän dip yazğan “Axios” xäbärenä cawap bularaq yasaldı.
Aq Yort höcümnärdän soñ AQŞ armiyäseneñ citäkçelelekne raketalar hawağa kütärelgändä höcüm başlanırğa toruı turında xäbärdar itkän, şul säbäple Trampnıñ qarşı çığu mömkinlege bulmağan dip belderde.
Tramp monnan tış, İzrailneñ Qatarda başqa höcümnär yasamayaçağın assızıqladı.
Oval ofista jurnalistlarnıñ sorawlarına cawap birgän Tramp: “Netan’yaxu Qatarğa höcüm itmäyäçäk”,- dide.
Qatarnıñ bik yaxşı berlektäş buluın äytep: “Küp kenä keşe monı belmi, ämma ul Qatarğa höcüm itmäyäçäk. Bälki başqa närsä êşlär”,- dide.
İlbaşınıñ närsä äytergä teläwe tögäl genä bilgele bulmasa da, bu süzlär Netan’yaxunıñ “Xamas” wäkillärenä qarşı başqa adımnar yasarğa mömkinlegenä işarät itä kebek.
Regional’ reakśiyälär
Doxa şähärendä ütkän Ğaräp-İslam sammitında liderlar İzrailneñ Qatarğa qarşı höcümnäreneñ töbäk öçen qurqınıç näticälär tudıraçağı turında kisätte häm İzrailneñ Yaqın Könçığışta yaña çınbarlıqnı tanırğa mäcbür itü omtılışlarına qarşı kümäk xäräkät itärgä çaqırdı.
Qatarnıñ räsmi “QNA” agentlığı bastırğan yomğaqlaw beldergesendä Doxağa höcüm ğayeplände häm Qatarğa tulı teläktäşlek belderelde.
Sammitta İzrailneñ agressivlığınıñ töbäktä tınıçlıq urnaştıru mömkinlegenä ayaq çaluı belderelde.
Belderüdä: “İzrailneñ töbäktä yaña çınbarlıqnı tanu plannarına qarşı torırğa kiräklege assızıqlandı, mondıy omtılışlarnıñ regional’ häm xalıqara iminlekkä turıdan-turı qurqınıç tudıruı turında da kisätü yasaldı.
Qatar - Misır häm AQŞ belän bergä qamaw astındağı Gazzädä utnı tuqtatu öçen aradaşçı bulğan däwlätlärneñ berse.
