Törkiyä êksportçılar mäclese, “Anadolu agentlığı”nıñ global matbuğat xezmättäşlege häm säwdä ministrlığınıñ yärdäme belän, bıyıl 12nçe tapqır ütkärüçe “Törkiyä innovaśiya atnası-2025” däwam itä.
Xaliç kongress üzägendä “Kiläçäk: xäzer” töp teması astında oyıştırılğan çara qısalarında “Yasalma aqıl çorında massaküläm mäğlümat çaraları” başçalı utırış uzdı. Anıñ moderatorı yazuçı Xälil İbrahim İzgi ide, ä “Anadolu agentlığı” ğomum mödire urınbasarı häm ğomumi tapşırular rejissyerı Yosıf Özhan çığış yasawçılar arasında buldı. Ul yasalma aqılnıñ qullanuçılarğa qısqa yul kürsätüçe tel modele buluın söyläde.
Özhan yasalma aqılnıñ texnologiyäneñ üseşe noqtasında bügengä qadär kürelgän iñ şaqqatqıç texnologiyä buluına iğtibarnı cälep itte häm anıñ, başqa innovaśiyälär belän çağıştırğanda, tağın da dulqınlandırğıç buluın belderde.
“Bu texnologiyäneñ artqı pärdäsen açsağız, anıñ älegä urınına utırmağan, bik êksperimental däräcädä buluın küräbez”, -di Özhan. Ul yasalma aqılnıñ “produktı” qullanuçılar buluın, şirkätlärneñ çın mäğlümatlarnı üzläre öçen saqlawın äytä.
“Bu şirklätlärneñ barısı mäğlümatlarnıñ çının üz êçendä tota. Tel modelläre millionnarça keşeneñ xäter mömklinleklärennän artığraqnı wäğdä itä, millionnarça keşeneñ ber minutta başqarıp çığa almayaçaq närsälärne birä. Şuña kürä bez dä xäzer tel modelläre belän êşlibez häm bu şaqtıy küñelle prośess”.
Özhan jurnalistlar qullana torğan sanlı çığanaqlarğa tuqtalıp bolay di: “Bügen jurnalistika yaña media häm sanlı platformalarğa duçar bulmıyça qala almas. Bez 7 qıytğada êşçänlek alıp baruçı global xäbär agentlığı, meñnärçä jurnalist belän daimi êlemtädä torabız. İñ ähämiyätle küzläw çığanağıbız - sanlı platformalar, tik iñ qıymmätle çığanağıbız - xäbärçe, täcribäle häm karyeralı keşe”.
