Düşämbe könne mäğ’lümat çaralarında çıqqan xäbärlärgä qarağanda, 330dan artıq keşe ğomeren yuğaltqan, 370 keşe isä yuğalğan dip isäplängän köçle su basulardan soñ berniçä il, şul isäptän Qıtay häm Avstraliya Şri – Lankağa yärdäm cibäräçäklären belderde.

Cirle media oyışması  “News 1st” Şri -Lankadakı Qıtay ilçelegeneñ aşığıç räweştä 100 000 AQŞ dolları biräçägen,  Nepalnıñ isä su basudan zıyan kürgän töbäklärgä yärdäm häm torğızu êşläre öçen 200 000 AQŞ dolları wäğ’dä itüen citkerde.

Avstraliya qotqaru häm torğızu êşlären başqaru öçen 1 million Avstraliya dolları (yaqınça 650 000 AQŞ dolları) yärdäm biräçägen äytkän bulsa, Hindstan su basudan zıyan kürgännärgä yärdäm kürsätü maqsatında barlığı 80 keşelek törkemnär cibärde.

Xäzerge waqıtqa qadär su basu näticäsendä 334 keşe ğomeren yuğaltqan, 370 keşe isä yuğalğan dip isäplänä.

17 noyabr’dä başlanğan naçar hawa torışı, su basu, cir şuışudan zıyan kürgän töbäklärdä êzläw-qotqaru êşçänlekläre däwam itä.

Uzğan çärşämbedä Ditwah śiklonı Şri - Lankağa kiterep bärde, yaqınça 1,12 million keşe häm  309 607 ğailä zıyan kürde.

Räsmi zatlar 1 275 yärdäm üzäge buldırdı, fäläkätkä duçar bulğan 180 499 keşe waqıtlıça sıyınu urını belän täêmin itelde.

Armiya keşelärne êvakuaśiyäläw öçen hawa häm ciröste operaśiyäläre alıp bara; yärdäm törkemnäre isä aşığıç räweştä azıq-tölek, su häm mediśina kiräk-yaraqları citkerergä tırışa.

“Daily Mirror” xäbärenä qarağanda, Şri - Lanka Hawa köçläre boralağı yäkşämbe könne fäläkät yärdäme operaśiyäläre barışında kilep töşkän, barlıq ekipaj qotqarılğan häm xastaxanägä cibärelgän.

Xökümät mäğarif, yuğarı belem häm hönäri belem ministrlığına qarağan barlıq universitetlarda, yuğarı belem birü oyışmalarında häm hönäri belem birü üzäklärendä 8 dekabr’gä qadär akademik êşçänlekne tuqtattı.

İlbaşı Anura Kumara Dissanayake şimbä könne ildä gadättän tış xäl iğ’lan itte.