Amerikalı rejissyer üz buınınıñ iñ yoğıntılı kinorejissyerlarınıñ berse bularaq bilgele ide.
Rob Rayner belän xäläl cefete Mişel Singer Rayner Könyaq Kaliforniyadağı yortlarında üle kileş tabılğan. Waqıyğa belän bäyle xäbärlärne yäkşämbe könne “CNN” häm “NBC” citkerde.
Los-Andjeles poliśiya departamentı yäkşämbe kiçen oyıştırğan matbuğat oçraşuında öydä tabılğan ike keşeneñ şäxes tanıqlıqların räsmi räweştä raslamawların, tikşerüneñ däwam itüen belderde.
Tikşerügä yaqın ber iminlek räsmi zatı ğomere özelgän keşelärneñ Rob Rayner häm Mişel Singer Rayner buluın rasladı. Räsmi zat başqa centekle mäğlümat birä almayaçağın häm “Associated Press”ka isemen açıqlamaw şartı belän intervyu birüen äytte.
Los-Andjeles poliśiya departamentınnan kapitan Mayk Blend waqıyğanıñ zur ixtimal belän cinayät bularaq bäyälänüen citkerde. Los-Andjeles Yanğın sünderü departamentı isä 15:30 tiräsendä adreska mediśina yärdäme çaqıruınnan soñ törkem cibärelgän.
78 yäşlek Rob Rayner 1970 yıllarda kürsätelgän häm ul waqıtta küp qaralğan “All in the Family” serialında Stivic role belän tanıldı.
Rayner annarı rejissyerlık karyerasında “The Princess Bride”, “When Harry Met Sally” häm “This Is Spinal Tap” filmnarı belän üz buınınıñ äydäp baruçı kinorejissyerlarınıñ bersenä äylände.
