Amerikadağı “CNN” kanalınıñ yaña tikşerenüe, AQŞ belän İran arasındağı kiyerenkelekneñ töbäktäge Amerika xärbi bazalarına yoğıntısın açıqladı.
“CNN”neñ iyärçen yazmalarına, zıyannı bäyäläw xisaplarına häm AQŞ belän Farsı qultığı çığanaqlarına tayanğan xäbärendä, 28 fevral'dän birle İran höcümnäre näticäsendä AQŞ armiyasınıñ Yaqın Könçığıştağı kimendä 16 bazasınıñ törle däräcädä zıyan kürgäne äytelde.
Xäbärdä qayber urınnarnıñ citdi zıyan kürüe häm qayber obyektlarnıñ qullanılmas xälgä kilüe belderelde. İran höcümnäre zur däräcädä töbäkneñ här poçmağına urnaştırılğan qamilläşkän radar sistemalarına, êlemtä infrastrukturasına, raketa saqlanu obyektlarına häm oçqıçlarğa yünälgän dip bilgeläp ütelde.
Xäbär itelgän yuğaltular arasında Yordaniyadäge Amerikanıñ “THAAD” raketa batareyalarına bäyle bulğan radar sistemaları häm Berläşkän Ğäräp Ämirleklärendäge qayber obyektlardağı radar sistemaları urın aldı.
“CNN” şulay uq, Soğud Ğäräbstanındağı hawa bazasına oyıştırılğan İran höcüme waqıtında ber “Boeing E-3 Sentry” oçqıçınıñ da yuqqa çığarıluın xäbär itte.
Pentagon räsmi zatları, ütkän atnada Kongressta AQŞnıñ İranğa qarşı höcümnäreneñ çığımı 25 milliard dollar tiräse buluın beldergännär ide.
Läkin aralarında “CNN” häm “CBS News” kebek çığanaqlar da bulğan küp kenä Amerikalı media oyışması İran belän suğışnıñ tuplam çığımı kimendä 50 milliard dollar buluın äytkän ide.
