İzrail ber xökümät dokumentına kürä yaw astındağı Yordannıñ könbatış üzänlegendäge möhim tarixi urınnıñ zur öleşen qulğa töşerergä planlaştıra.

“The Associated Press” pänceşämbe könne alınğan dokumentka kürä İzrailneñ Grajdanlılar departamentı Yordannıñ könbatış üzänlegendäge zur arxeologik urın bulğan Sebastianıñ kiñ öleşen êkspropriaśiya niyäten açıqladı.

Bistä tözügä qarşı çığuçı törkem “Peace Now” miras mäydanınıñ yaqınça 180 gektar buluın, monıñ arxeologik yaqtan İzrailneñ iñ zur qulğa töşerü buluın belderde.

Älege adım İzrail qanunsız räweştä tözegän bistälärdä yäşäwçelär Bäytüllahim yanında yaña bistälärneñ qorıluın qotlağan waqıtta häm Yordannıñ könbatış üzänlegennän ber aktivistnıñ qulğa alınıp, xastaxanägä salınuı xäbärennän soñ yasaldı.

Keşe xoquqların küzätü oyışması İzrailneñ bıyıl Yordannıñ könbatış üzänlegendäge öç qaçaqlar lagerennän 32 meñ fälästinlene mäcbüri räweştä çığarıp, suğış cinayäte başqaruın citkerde.

“Peace Now” meñnärçä zäytün ağaçı üskän populyar arxeologik urınnıñ fälästinlelärneke buluın belderde.

İzrail 2023 yılda bu urınnı turistik üzäkkä äyländerergä uylawn açıqladı.

Fälästinlelärneñ iğlan itelgän qararğa qarşı çığu öçen 14 könnäre bar.

“Peace Now”ğa kürä İzrail tarafınnan monnan alda qulğa töşerelgän iñ zur tarixi cirlek yaw astındağı Yordannıñ könbatış üzänlegendäge Susya awılında urnaşqan cir uçastogı ide.

İzrail bistälärendä yäşäwçelär Bäytüllahim yanında röxsätsez genä yaña iminlek bülekçäse qoruların äytte.

Cirle “Etzion” urnaşu şurası başlığı Yaron Rosental monnan qanäğat qaluın citkerde.

Yaña iminlek bülekçäse sişämbe könne ber İzrail keşese pıçaq qadap üterelgän urınğa yaqın.