Ğıyraq tışqı êşlär ministrı Fuad Xösäyen AQŞ häm İzrailneñ İranğa höcümnäre belän başlanğan suğış arqasında ileneñ yaqınça 60 milliard dollar zıyan kürüen belderde.
Ğıyraq xäbär agentlığı (INA) mäğlümatlarına qarağanda, tışqı êşlär ministrı Xösäyen İtaliya tışqı êşlär ministrı Antonio Tayani belän başqala Rimda urtaq matbuğat oçraşuı ütkärde.
Oçraşuda ministr Xösäyen AQŞ/İzrail–İran suğışınıñ Ğıyraq iqtisadına yoğıntısın bäyäläde, bäreleşlärneñ däwam itüe il iqtisadına citdi yuğaltular kiterde dip belderde.
Xösäyen älege suğış arqasında Ğıyraqnıñ yaqınça 60 milliard dollar zıyan kürüen citkerde.
28 fevral'dän birle däwam itüçe suğışnıñ dönya külämendäge ênergetika krizisın tağın da tiränäytüen häm inflyaśiyäneñ artuına bäyle borçılularnı köçäytüen kisätkän Xösäyen, suğışnıñ Awrupa illären dä kertep, küp kenä iqtisadlarğa tiskäre yoğıntı yasawın bilgeläp ütte.
Ğıyraq tışqı êşlär ministrı Fuad Xösäyen kiyerenkelekne kontrol astına alu häm bäreleşlärneñ cäyelüenä yul quymaw öçen diplomatik tırışlıqlarnıñ möhimlegen assızıqladı.
Awrupa Berlege häm Awrupa illäreneñ konflikt yaqları arasında kileşügä ireşü häm alarnı söyläşülär östälenä qaytaru öçen näticäle rol' uynarğa tiyeşlegen beldergän ministr Xösäyen bu adımnarnıñ kiyerenkelekne kontroldä totarğa häm bäreleşlärneñ cäyelüenä yul quymawğa öleş kertäçägenä basım yasadı.
Ministr Xösäyen monnan alda yasağan belderülärendä Ormuz buğazında diñgez transportı xäräkäteneñ bozıluı arqasında Ğıyraqnıñ neft' keremnäre kimüen häm monıñ il iqtisadına citdi yuğaltular kiterüen beldergän ide.
