Süriyäneñ Rakka vilayätendä iminlek köçläre moña qädär “YPG” terror oyışması tarafınnan idarä itelgän ber törmädän 18 yäşkä qädärge 126 totqınnı azat itte. Süriyäneñ “Alikhbaria” televideniyäse irekkä cibärelgännärneñ barısınıñ da bala buluın belderde.

Kanalnıñ isemen äytmägän iminlek çığanağına nigezlänep citkergän xäbärendä: “Êçke iminlek berämlekläre Rakkadağı Al Aqtan törmäsennän 18 yäşkä qädärge 126 totqınnı irekkä cibärde”, - dip äytelde.

İnformaśiyä ministrı Xämzä äl-Mostafa “X" sośial media platformasınnan urtaqlaşqan yazmasında “SANA” Süriyä ğäräp agentlığı bastırğan sürätlärneñ totqınnarnıñ irekkä cibärelüen kürsätüen belderde.

Äl-Mostafa: “Bu balalar barı tik totqın ğına tügel, balaçaqları urlanğan balalar. Mäktäplärdä häm uyın mäydannarında bulır urınğa törmä divarlarınıñ artında ide. Här yöz qurqu, ayırılışu häm yuğalğan gäyepsezlekneñ xikäyäsen çağıldıra”, - dip äytte.

Balalarnıñ törmädä totıluın keşelek vöcdanın yaralağan wazğiyät bularaq bäyäläwçe äl-Mostafa: “Ber balanıñ törmä kamerasında totıluın añlatırlıq bernindi şiğär dä, aqlaw da, qurqınıçsızlıq säbäbe dä yuq”, - dip bilgeläp uzdı.

İlbaşı idaräse süzçese Äxmäd Muaffaq Zaidan da “X" aşa yasağan belderüendä bu ğämälne “waqıt häm kiñlek çiklärennän çittä êşläwçe bandalar tarafınnan qılınğan tulı qanlı cäncal”, - dip atadı.

Ğädälät (yustiśiyä) ministrlığı comğa könne yasağan belderüendä däwlät avtoritetınıñ urnaştırıluı häm oyışmalarnıñ êşçänlegen xoquqıy qısalar êçendä torğızu qısalarında “YPG”neñ çigenüennän soñ “Al Aqtan” törmäsen räsmi räweştä üz östenä aluın iğlan itte. Êçke êşlär ministrlığı da totqınnarnıñ êşläreneñ tikşerelä başlanuın belderde.

Şul uq waqıtta Süriyä armiyası 18nçe ğinwar kileşüeneñ ütälüeneñ berençe êtabı qısalarında Rakkadağı “Al Aqtan” törmäsennän häm tirä-yağınnan çığarılğan “YPG” êlementlarınıñ Xälebneñ könçığışındağı Ayn äl-Arab şähärenä küçerelä başlanuın iğlan itte.