Awrupa Berlege üzendäge oyışmalarda saqlanuçı Rusiyä aktivların "bilgesez waqıtqa qadär xäräkätsez qaldırırğa" qarar qıldı. Bu xaqta berlekneñ tışqı säyäsät citäkçese Kaya Kallas belderde.

"Bu, Rusiyä Ukrainağa kitergän zıyan öçen tulısınça kompensatsiya tülämägänçä, Awrupa territoriyäsendä Rusiyäneñ 210 milliard yevroğa (246 milliard dollar) qadär aktivlarınıñ qalıp toruın täêmin itäçäk", — dip yazdı Kallas comğa könne “X”ta.

Awrupa Komissiyase räise Ursula von der Leyen bu qararnı xupladı häm monıñ Rusiyägä suğış däwam itkän çaqta anıñ çığımnarı tağın da artuın kürsätüçe "köçle signal" cibärüen äytte.

Bu qarar bloknıñ Ukrainaga 105 milliard dollar azat itärgä tırışuı arqasında qabul itelde: bu akçanı ya turıdan-turı burıç alıp, ya “Euroclear”da sanktsiyalar belän tuñdırılğan Rusiyä aktivların qullanıp täêmin itü mäsäläse tora ide.

Awrupa Berlegendä tuñdırılğan Rusiyä aktivlarınıñ küp öleşenä iyä Belgiya planğa qarata borçu belderde. Ul, näticädä, ilneñ berüze xoquqıy awırlıqlar belän oçraşaçağı häm finans cawaplılıqnı üz östenä alaçağınnan qurqa.

Belgiya xökümäte Awrupa Komissiyase täqdim itkän başlanğıç proyektqa finans häm xoquqıy risklarnı kimetü häm “Euroclear”ne yaxşıraq saqlaw maqsatında berniçä üzgäreş kertüne soradı.

Şul uq waqıtta, Rusiyä Üzäk Bankı comğa könne irtän yasağan belderüendä Awrupa Berlegeneñ tuñdırılğan aktivların qullanu planın qanunsız dip atadı häm täqdimnärgä xoquqiy yaqtan qarşı çıgaçağın belderde.