Törkiyä ilbaşı Räcäp Tayyip Ärdoğan İzrail kebek aktyerlarnıñ suğış utın yañadan qabızırğa tırışuına qaramastan barışnı saq optimizm belän küzätülären äytte.

Ärdoğan comğa könne İstanbuldağı Dolmabahçä İlbaşı idaräse ofisında oyıştırılğan "Törkiyä Ğasırı - investiśiyaneñ köçle üzäge" isemle programmada yasağan çığışında töbäkneñ dä, dönyanıñ da ütkängä qayta almayaçağın belderep: “Mondıy köçle tetränü näticäsendä barlıqqa kilgän kitelülärneñ çağılışların waqıt belän tağın da yaxşıraq kürep bulaçaq,” - dip äytte.

Ärdoğan: “Törkiyä soñğı yıllarnıñ iñ zur iminlek krizislarınıñ bersen uñışlı räweştä idärä itep, üz töbägendä totrıqlılıq utrawı ikänen tağın ber qat rasladı”, - dide.

Ärdoğannıñ bu açıqlawları, İzrailneñ Ğazzädäge suğışı, Livan häm Süriyägä qarşı däwam itüçe höcümnäre häm İran belän turıdan-turı kiyerenkelekne arttıruın da kertep, töbäktäge xärbi agressiyasen berniçä frontka cäygän çorda yasaldı.

Törkiyä İzrailneñ artqan höcümnäreneñ töbäktäge totrıqlılıqnı qaqşatu häm zurraq bäreleşne başlatu qurqınıçın tudıruı turında küp märtäbälär kisätü yasap, Yaqın Könçığışta salqın qanlılıq häm kiyerenkelekne kimetügä çaqıruçı, totrıqlılıq täêmin itüçe aktyer bulıp tora.

Ärdoğan şulay uq Törkiyäne dönyanıñ alda baruçı investiśiya üzägenä äyländerü öçen kiñ qolaçlı reformalar başqarırğa süz birde häm ilneñ töp finans töbägenä xalıqara kapital cälep itügä yünältelgän yaña täşwiklärgä işaräläde.

Xökümätneñ iqtisadi yul kartası turında söylägändä, Ärdoğan Änkara citäkçelegeneñ Törkiyäne dönyanıñ iñ cälep itüçän investiśiya üzäkläreneñ berse itü öçen kiñ qolaçlı tärtipkä salular başqaraçağın äytte häm investorlarnıñ ışanıçı belän köndäşlekne arttıruğa qarağan yaña adımnı assızıqladı.

Planda berençe urında İstanbul Finans üzäge tora. Xökümät bu töbäktä êşläwçe şirkätlär öçen östämä salım taşlamaları buldırunı maqsat itep quya.