Ärdoğan Bötendönya azıq-tölek forumınıñ açılış tantanasına cibärgän video-yullamasında çaranı oyıştıruğa öleş kertkän BMOnıñ Azıq-tölek häm awıl xucalığı oyışması belän ber rättän barlıq paydaşlarğa räxmät äytte.
İlbaşı tübändägeçä citkerde:
“Bügen “İnnovaśiyalär - kiläçäk nigeze” teması belän oyıştırılğan Bötendönya Azıq-tölek forumınıñ keşelek öçen xäyerle buluın telim. /.../ Klimat üzgäreşe, tirä-yaqnı saqlaw häm azıq-tölek qurqınıçsızlığı kebek möhim ölkälärdä kiläçäk buınnarğa yäşäw öçen yaraqlı dönya qaldırırğa telibez. Ber yaqtan xätta qorı ikmäk taba almağan millionlağan keşeneñ yäşäw köräşenä şahit bez, ä ikençe yaqtan azıq-tölek israfı artqan dönyada tınıçlıq, mullıq turında söyläşä almıybız. Törkiyä bularaq bu çınbarlıqtan êş itep, bez qurqınıçsız azıq-tölekkä ireşüne täêmin itü mäs’äläse genä tügel, ä milli qurqınıçsızlığıbıznıñ töp êlementı bularaq küräbez häm bu yünäleştä adımnarıbıznı yasıybız.”
Dönyada yılına milliard yarım tonna azıq-tölek israf itelä
“Global xisaplarğa qağadanda azıq-tölek israfınıñ iñ zur öleşe yaqınça 60% belän öylärdä, yäğni qullanuçı däräcäsendä küzätelä. Dönyada här yıl citeşterelüçe yaqınça milliard yarım tonna azıq-tölekneñ yuğaluı häm israfı belän köräşkä ähämiyät biräbez.
2020 yılda bez başlap cibärgän “Rizığıñnı saqla, östäleñne qaderlä” iniśiativası bik qısqa waqıtta zur uñışqa ireşte. İkmäk israfın tuqtatu kampaniyase näticäsendä ikmäk israfın 18%ka kimettek. Xäläl cefetem Äminä Ärdoğan citäkçelegendä 9 yıl êlek başlanğan “Qaldıqsız tormış” xäräkate yärdämendä bu ölkädä global üzañğa öleş kertäbez.
Bıyıl 9-20 noyabr könnärendä Antaliyada uzdırılaçaq COP31 çarası waqıtında täcribälärebezne praktik alımnarğa äwerelderü öçen adımnar planlıybız. Çara waqıtında “Birüzä bäyläneş” isemle iniśiativabız aşa azıq-tölek qurqınıçsızlığın häm klimat yöklämälären urtaq platformada berläşterüne maqsat itep quyabız.”
