Avstraliya prem’yer-ministrı Êntoni Albaniz genośidçı Netan’yaxunıñ Fälästin däwläten tanunı "terrorğa qarşı absurd büläk” dip atawınnan soñ, xökümäteneñ tanu qararın yaqladı.
Albaniz yäkşämbe könne N’yu-Yorktağı BMOda jurnalistlarğa yasağan belderüendä:
"Avstraliya Fälästinne tanu mäs’äläsendä küptän inde ilneñ ike partiyäse dä yaqlap kilgän poziśiyägä turı kilä torğan totış kürsätte. Bez ike däwlätle çişeleşne yaqlıybız", – dide.
Albaniz Avstraliyäneñ 1948 yılda BMOnıñ İzrail däwläten tözüendä uñay rol’ uynawın iskärtep: "İke däwlät tözü ul waqıtta da küzdä totılğan ide", – dip assızıqladı.
Prem’yer -ministr şulay uq andağı gumanitar fäläkätne çişü öçen tiz arada utnı tuqtatu, totıqlarnı azat itü häm Ğazzägä gumanitar yärdäm cibärüne yañadan başlarğa çaqırdı.
“Ozın möddätle çişeleş”
Albaniz daimi tınıçlıqnıñ izraillelär belän fälästinlelärneñ kiläçäktä tınıç häm imin yänäşä yäşi aluı öçen ozın möddätle çişeleşkä yünälgän adımnar kiräkterüen äytte.
Albaniz yäkşämbe könne X çeltärenä urnaştırğan belderüendä:
"Avstraliya 2025 nçe yılnıñ 21 nçe sentyabrennän başlap bäysez häm suveren Fälästin däwläten räsmi räweştä tanıy”, – dip yazdı.
Netan’yaxu isä şul uq könne Avstraliya, Böyekbritaniya häm başqa illär tarafınnan iğ’lan itelgän tanu qararın "terrorğa qarşı absurd büläk" dip atap tänqıyt’läde.
