Gaagada ğomerlek törmä cäzasın ütäwçe Bosniya serb suğış cinayät’çese Ratko Mladiçnıñ ciñelçä insul’t kiçerüe häm sälamätlegeneñ naçarayuı belderelde.

Anıñ ulı Darko Mladiç Bosniya serb däwlät televideniyäsenä birgän äñgämäsendä ätiseneñ sälamätlege turındağı berençe mäğl’ümatnı üzenä comğa könne BMO räsmi tabibı citkerüen äytte.

Mladiç bolay dide: “Tabib monıñ (ciñel) insul’t buluına ışanuların, ätiyemne  grajdanlıq xastaxanäsenä alıp kitülären, tikşerülärdän soñ törmägä kire qaytarıluın añlattı”.

Darko Mladiç süzlärençä, ätiseneñ xäle könnän – kön naçarlana.

Xälneñ bik citdi buluın äytkän Darko Mladiç: “Serb tabibları tikşerä alsın öçen bez äle dä Gaagadan mediśina dokumentların kötäbez”,- dide.

Ul şulay uq 81 yäş’lek ätiseneñ Serbiyädä däwalanuına röxsät bireler dip ömetlänüen dä östäde.

Mladiç 16 yıl buyı qaçaq bulıp yäşägännän soñ 2011 yılda Serbiyädä qulğa alındı.

Bosniyädä 1990nçı yıllarda başlanğan suğışta möselman bosniyälelärgä qarşı êşlägän genośid häm suğış cinayät’läre öçen 2017 yılda êlekkege Yugoslaviya Xalıqara cinayät’ mäxkämäse tarafınnan ğomerlek törmä cäzasına xökem itelde.

Gaagadağı räsmi zatlar Mladiçnıñ xäle turında räsmi belderü yasamadı.