İzrail xärbiläre AQŞ ilbaşı Donald Tramp täqdim itkän plan nigezendä Ğazzädän çigenüen başlap cibärde, dip xäbär itä İzrail mäğlümat çaraları.
“Kiläse 24 säğät eçendä İzrail armiyäse Ğazzädä bilgelängän urınnardan sarı sızıqqa qadär çigenüne tögällär, bu Tramp planında İzrail belän “Xamas” arasında kileşengän,” - dip xäbär itte İzrailneñ “Kanal 12” comğa könne.
Xäbärdä bolay diyelä: “Gaskärilär Räfax häm Xan Yunıstan häm Ğazzäneñ tönyaq öleşlärennän çigenep, İzrail däwläte çigenä yaqınayaçaq.”
Pänceşämbe irtän Tramp İzrail belän Fälästinneñ qarşılıq kürsätü törkeme “Xamas” arasında anıñ utnı tuqtatu häm totıqlar belän almaşu planınıñ berençe êtabı turında kileşü tözelüen citkergän ide.
Bu kileşü Misırnıñ Şarm-äş-Şäyx şähärendä, AQŞ citäkçelegendä, Törkiyä, Misır häm Qatar wäkillekläre qatnaşında ike taraf arasında dürt kön barğan turıdan-turı bulmağan söyläşülärennän soñ täêmin itelde.
