İran tışqı êşlär ministrlığı ilbaşı Mäsud Päzäşkiyannıñ da, tışqı êşlär ministrı Abbas Araqçinıñ da Misırda uzaçaq Ğazzä sammitına çaqıru aluların, tik qatnaşmayaçaqların belderde.

Däwlät xäbär agentlığı IRNA xäbär itüençä, Misır yäkşämbe kiçendä İrannı Şarm äl-Şäyxta, Qızıl diñgez buyında uzaçaq sammitta qatnaşırğa çaqırğan.

Läkin düşämbe irtäsendä Araqçi “X” platformasında bolay dip yazdı: "İlbaşı Päzäşkiyan da, min dä İran xalqına höcüm itkän, bezgä yanawçı häm sanksiyälär kertüçe xezmättäşlär belän oçraşa almıybız," dide, AQŞqa işarä yasap.

Vaşington iyün ayında 12 könlek suğış waqıtında İzrail belän bergä İran atom-töş obyektlarına höcüm itüçelär arasında buldı.

Ministr beldergänçä, Tähran, şulay da, İzrailneñ Ğazzädäge genotsidın beterü häm fälästinlelärnen üz kiläçäklären üzläre tözü xoquqın yawlaw mäsäläsendä barlıq omtılışlarnı yaqlıy.

İran İzrailne tanımıy häm, 1979nçı yılda AQŞ yaqlawındağı Şax rejimı bärep töşerelgännän birle, Fälästin mäsäläsen tışqı säyäsäteneñ töp yünäleşe itep sanıy.

Ğazzä sammitı, AQŞ ilbaşı Donald Tramp häm anıñ Misırdağı xezmättäşe Abdel Fattah äl -Sisi citäkçelegendä uza, häm anıñ maqsatı - utnı tuqtatu kileşüen nığıtu häm suğıştan soñğı säyäsi nigezne bilgeläw.

Çarada 20dän artıq il citäkçeläre qatnaşır dip kötelä, läkin İzrail dä, “Xamas” ta bulmayaçaq.