Nepal xökümätneñ bärep töşerelüe belän tämamlanğan, yäş’lär äydäp barğan korrupśiyägä qarşı protestlar waqıtında yaqtı dön’yadan kitkän 73 keşeneñ istälegenä çärşämbe könne milli matäm iğ’lan itep, bayraqlarnı yartılaş töşerde.
Êçke êşlär ministrlığı beldergänçä, uzğan atnada ike kön däwam itkän protest çaralarınnan soñ wazıyfaga kilgän waqıtlı xökümät protestlarda ülüçelär öçen matäm köne iğ’lan itte.
Protestlar 8 nçe sentyabr’dä sośial’ çeltärlärgä qısqa waqıtlı çikläw kertelügä cawap itep başlandı häm korrupśiyägä, ozaq waqıt däwam itkän iq’tisadıy problemalarğa qarşı açu arqasında köçäyde.
Berençe köndäge qatışuda kim digändä 19 keşe ülde.
Ülemnär belän bäyle açu tağın da arttı häm il külämendä xökümät binalarına, 1 Hilton qunaqxanäsenä häm başqa binalarğa ut törtügä kiterde.
Protestlarnı äydäp baruçı möhim oyışma bulğan Hami Nepal sosial’ çeltärdä bolay dip belderde: “Bügen bez şahit bulğan üzgäreşlär protestlar waqıtında ülüçelärneñ batırlığı häm fidaqar’lege bulmasa bulmas ide”.
73 yäş’lek êlekke baş sud’ya häm prem’yer-ministr Suşila Karkiğa tärtipne torğızu häm altı ay êçendä uzaçaq saylawlar aldınnan protestçılarnıñ korrupśiyädän arındırılğan kiläçäk taläplären cirenä citkerü wazıyfası tapşırıldı.
Karki qorbannarnıñ şähit dip iğ’lan iteläçägen häm cenazalarında däwlät tarafınnan xörmät kürsäteläçägen wäğ’dä itte.
22 yäş’lek säwdägär qız Pooja Şrestxa matäm köne keşelärne berläşterä dip bolay dide:“Böten keşe bu waqıyğalarğa, keşelärneñ ğomerläre özelüenä qayğıra — alarnıñ barısı da beznen kebek yäş’lär ide. Xäzer êşlär beraz äybätlände häm bez yaña xökümät kiräkle üzgäreşlär kiterer dip ömetlänäbez”.
Bötendön’ya bankı mäğ’lümatlarına qarağanda, Nepalda 15–24 yäşendäge yäş’lärneñ biştän bere êşsez häm ber keşegä turı kilä torğan milli tulayım tabış barı tik 1 447 dollar ğına.
Poliśiya süzçese Binod Xarel çärşämbe könne beldergänçä, protestlar waqıtında ülüçelär sanı, poliśiya xezmätkärläre häm kümäk qaçqan totqınnarnı da kertep 73kä citkän.
Xarel äytüençä, protestlar waqıtında törmädän qaçqan 13 500 totqınnıñ öçtän berennän kübräge yañadan totılğan yäisä üze teläp qaytqan. “Bügenge köngä qadär qaçqan yaqınça 5 000 totqın törmälärgä kire qayttı, kübese ixtıyari räweştä”,- dide ul.
