Törkiyä ilbaşı Räcäp Täyyip Ärdoğan comğa könne Törkiyä teleradiokompaniyäse TRTneñ 62 yıllığın qotlap, oyışmanı global’ media dön’yasında möhim referens noqtası häm arta baruçı dezinformaśiyägä qarşı balanslaştıruçı êlement dip atadı.
TRT ğomum mödire Mäxmät Zahid Sobacığa möräcäğat’ itelgän yullamada Ärdoğan TRTneñ küp tellı tapşıruların nığıtuın häm sanlı platformalarğa yaraqlaşuın iskärtte, oyışmanıñ ilneñ tawışı häm millätneñ xätere bulıp qaluın äytte.
İlbaşı Ärdoğan üzeneñ täbrik yullamasında bolay dide:
“Min oyışqan könnän birle däwlät, cämğıyät’ tapşıruları cawaplılığın layıqlı räweştä ütärgä tırışqan TRTne 62 yıllığı belän küñeldän qotlıym.
Texnologik alğarışlar nigezendä tapşıru sıyfatın könnän -kön arttırğan häm êşçänlek dairäsen kiñäytkän TRT bügen dä barlıq kanalları häm küp tellı tapşıruları belän radio häm televidenie ölkäsendä bezneñ äydäp baruçı oyışmabız bulıp qala.
Śifrlı dön’yağa uñışlı caylaşqan TRT ilneñ tawışı, millätneñ xätere häm cawaplı tapşırularda äydäp baruçı üzençälegen qatğıy räweştä däwam itä.
Bügenge köndä TRT global’ masştabta artqan dezinformaśiyägä qarşı xaqıyqat’kä nigezlängän tapşıruları belän xalıqara mediada möhim tayanıç noqasına äylände häm ul millätebez öçen ğorurlıq çığanağı.
Küp kenä şäxeslär äzerläwdä möhim rol’ uynağan, radio häm televidenie ölkäsendä ber mäktäp bulğan TRTneñ uñışlı, sıyfatlı häm tarmaqqa yünäleş birüçe original’ äsärlärenä yañaların östäwen kötäm.
Şuşı forsattan faydalanıp, TRT ğailäseneñ barlıq äğ’zalarına xezmätläre häm tırışlıqları öçen räxmät belderäm, kiläçäktä dä şundıy uq qatğıylıq belän êşläwen däwam itüenä, ilebezneñ, millätebezneñ häm böten cäberlängännärneñ köçle tawışı bulıp qalaçağına çın küñeldän ışanam.”
“Törkiyä ğasırı” – ilbaşı Räcäp Täyyip Ärdoğan tarafınnan 2023 yılda Cömhüriyätneñ 100 yıllığı uñayınnan iğ’lan itelgän töp säyäsi qaraş bulıp alğı planğa çığa. Ul Törkiyäneñ diplomatiya, saqlanu, iq’tisad häm media ölkälärendä global’ yoğıntısın arttırunı maqsat itep quya.
TRT televidenie häm radio tapşırularınnan tış kino, global’ mäs’älälär, professional’ täcribä urtaqlaşu, balalar mänfäğat’lären yaqlaw prinśibı, yäş’ tapşırular äzerläwçelärgä yärdäm häm başqa küp kenä ölkälärdä oyıştırğan milli häm xalıqara çaralar, festival’lär, xezmättäşlek häm büläkläw programmaları aşa kiñ auditoriyägä zur öleş kertä.
Küp sanlı kanalları häm kontentı belän tamaşaçılar arasında aldınğı poziśiyäsen saqlap qalğan TRT urtaq kino proyektları aşa dön’ya kino êkrannarında millionlağan keşegä barıp citä häm qazanışları isemlegenä abruylı xalıqara büläklär östi.
