“TRT World Citizen” büläkläreneñ cidençese qitğalar arasında tirän humanitar êzlär qaldırğan êşçänlek başqarğan iğtibarğa layıq şäxeslärne cıydı. Tantana waqıtında Törkiyä İlbaşı Räcäp Tayyip Ärdoğannıñ xäläl cefete Äminä Ärdoğannıñ şähit Ğazzä xäbärçese Yahya Barzaknıñ änise belän qoçaqlaşuı belän toyğısal mizgellär yäşände.
Comğa könne “TRT” tarafınnan oyıştırılğan tantanada dönyanıñ iñ qatlawlı şartlarında tormışnı yaxşırtuçı häm keşe qaderen yaqlawçı pedagoglar, yäş liderlar, êlemtäçelär, miğmar-arxitektorlar häm xoquq yaqlawçılar bilgeläp ütelde.
Tantanada qatnaşuçılar arasında Törkiyä İlbaşınıñ xäläl cefete Äminä Ärdoğan da bar ide. Ärdoğan tel, tös häm geografiyädän östen çıqqan mäğnäle oçraşuda qatnaşuına şatlığın belderde.
Räsmi “X" akkauntında urtaqlaşqan yazmasında çaranıñ keşelekneñ çiklärne tanımawın xäterlätüenä häm bik küp isemsez qaharmannıñ tağın da ğädelräk dönya öçen tırışırğa däwam itüenä basım yasadı.
Bıyılğı büläklär törle yoğıntı räweşlären alğı planğa çığardı.
Belem birüçe büläge - Livan belän Ürdündä (İordaniyädä) distälägän meñ qaçaqqa häm awır xäldä qalğan balalarğa sıyfatlı belem alu mömkinlegen birgän sanlı uqu ısulı belän ayırılıp torğan “Thaki” platformasına nigez saluçı häm yuğarı däräcäle citäkçese Rudayna Abdoğa birelde.
Yäşlär büläge – çüp-çar belän tulı mäydannarnı, qabat êşkärtelgän materiallar qullanıp, qurqınıçsız uyın mäydançıqlarına äyländerä torğan icadi êkologik başlanğıçları öçen Nigeriyalı aktivist Amara Nwuneligä birelde.
Êtik aralaşu ölkäsendä Kommunikaśiyä premiyası yasalma fähem häm bolıt texnologiyäläreneñ keşe xoquqların bozu oçraqları belän bäyläwgä qarşı prinśipial poziśiyäläre öçen programmistlar Ibtihal Abousaad häm Vaniya Agrawalğa bergä birelde.
Yahya Barzak
Kiçäneñ iñ teträndergeç mizgele “Yılnıñ dönya watandaşı” bülägen tapşıru waqıtında büläkneñ şähit Ğazzä xäbärçese Yahya Barzaknıñ layıq buluı belän yäşände.
Barzak 30nçı sentyabrdä Ğazzädän xäbär äzerlägän çaqta İzrail oyıştırğan höcümdä häläq bulğan ide. Xäbärçe İzrail qılğan genośid şartlarında tınıç xalıqnıñ kiçereşlären dokumentlaştıra ide.
Ul üz kamerası aşa ğadi keşelärneñ tınıç qarşılıqların, abruyın häm ğazapların kürsätte, töbäktän çittä dä yañğırağan döres xikäyäläw mirasın qaldırdı.
Äminä Ärdoğan çığışında Barzakqa häm İzrail tarafınnan üterelgän böten fälästinlelärgä xörmäten citkerde.
Xisle mizgel
Tantana waqıtında Äminä Ärdoğan Yahya Barzaknıñ änisen qoçaqlap alğaç, tirän xis-toyğılı mizgel barlıqqa kilde.
Bu qoçaqlaşu räsmi protokoldan östen çıqqan urtaq qayğı häm şäfqätlelekne simvollaştırdı, barı tik şäxsi qayğı urtaqlaşunı ğına tügel, yuğaltu aldında teläktäşlek häm berdämlek yullamasın da çağıldırdı.
Küzätüçelär bu mizgelne kiçäneñ iñ teträndergeç küreneşläreneñ berse dip atadılar, büläklärneñ keşelekle asılın çağıldırğan küreneş täqdim ittelär.
