Hindstan häm Butan düşämbe könne ike ilne totaştıraçaq berençe çik aryağındağı timer yulı liniyasen töziyäçäklären äytte.

454 million dollarlık älege proyektnıñ 4 yılda tämamlanuı kötelä.

Hindstan tışqı êşlär ministrlığı särqätibe Vikram Misri beldergänçä Butannıñ töp säwdä partnyerı bulğan Hindstan Gimalaylarda urnaşqan bu patşalıq ileneñ asqorıma häm iqtisadınıñ modernizaŝiyasendä möhim rol uynıy.

Hindstannıñ timer yulı ministrı Aşvini Vaişnav timer yulı proyektınıñ Butan xalqına zur fayda kiteräçägen äytte.

Vaişnav: "Barlıq töbäk ber-bersenä totaşaçaq. Bügen könnär buyı däwam itüçe tovar taşu berniçä sägättä çınğa aşırılaçaq,” – dide.ütün

Berençe êtapta 34,56 milliard rupi yägni 390 million dollar belän tözeläçäk 69 çaqrımlıq timer yulı liniyase Hindstannıñ tönyaq-könçığışındağı Kokradjhar şähären Butandağı 10 meñ keşe yäşäwçe Gelephu rayonına totaştıraçaq.

5,77 milliard rupi yägni 65 million dollarlık ikençe 20 çaqrımlıq timer yulı liniyase isä Butannıñ tönyaq-könbatışındağı sänägät üzäge Samtsene Hindstannıñ könçığışındağı Banarhatka totaştıraçaq.

Keçkenä, diñgezgä yarı bulmağan häm 800 meñnän äz keşe yäşägän Butan Qıtay häm Hindstan arasında urın ala.

Butan çit il investiŝiyalären häm turistlarnı cälep itü öçen Gelephu rayonın iqtisadi töbäk bularaq üsterüne maqsat itä. Yaña timer yulı isä bu üseştä möhim rol uynıy.

Misri: “Bu töbäk Butannı Könyaq Aziya häm Könyaq-könçığış Aziyane totaştıruçı iqtisadi üzäk bulaçaq,” – dide.