BMOnıñ Fälästin qaçaqlarına yärdäm kürsätü agentlığı pänceşämbe könne belderü yasap, İzrailneñ ike yıldan artıq däwam itkän suğışı näticäsendä Ğazzäneñ 61 million tonnadan artıq cimerek belän qaplanuın açıqladı.
Agentlık X platformasında bolay dip yazdı: “Böten mäxällälar yuq itelgän häm ğailälär cimereklär arasında su, sıyınu urını êzli.”
Agentlık İzrail qamalışına häm yärdäm zapaslarına quyılğan çikläwlärgä qaramastan Ğazzädä üzeneñ gumanitar missiyasen häm Fälästin xalqına yärdäm kürsätü êşlären däwam itüen assızıqladı.
BMOnıñ Fälästin qaçaqlarına yärdäm kürsätü agentlığı ğomum komissarı Filip Lazzarini süzlärenä qarağanda agentlıkta Ğazzäneñ böten xalqı öçen kiläse öç ayğa citärlek daru, kiräkle materiallar häm azıq-tölek zapasları bar.
2024 yılnıñ oktäbrendä İzrail parlamentı Knesset agentlıknıñ basıp alınğan Yordannıñ könbatış üzänlege häm Ğazzädäge êşçänlegen tıyu öçen tawış birde. Bu qarar 2023 yılnıñ 7 oktäbrendä Fälästin törkeme “Xamas” tarafınnan oyıştırılğan höcümnärdä agentlık xezmätkärläreneñ qatnaşuı turındağı ğayepläwlärgä nigezlände.
Läkin çärşämbe könne BMO Xalıqara mäxkämäse İzrail ğayepläwlären kire qağıp: "İzrail agentlık xezmätkärläreneñ zur öleşeneñ “Xamas” äğzaları buluın yäisä höcümnärdä qatnaşuın isbatlıy almadı,” - dide.
Mäxkämä şulay uq İzrailneñ Jeneva kileşüe nigezendä öçençe däwlätlär häm BMOnıñ Fälästin qaçaqlarına yärdäm kürsätü agentlığı häm Xalıqara Qızıl Xaç Komitetın da kertep, tarafsız gumanitar oyışmalar tarafınnan täqdim itelgän yärdäm programmaların qabul itärgä häm alarnıñ Ğazzägä ireşüen qulaylaştırırğa tiyeş buluın belderde.
2023 yılnıñ oktäbrennän birle İzrail suğışında 68 meñnän artıq keşe ülgän häm 170 meñnän artıq keşe yaralanğan dip xäbär itä Ğazzä sälämätlek saqlaw ministrlığı.
10 oktäbrdä Donald Tramp täqdim itkän plan nigezendä utnı tuqtatu kileşüe ğamälgä kerde.
