Sudanda paramilitar köçlär Darfurda, küçep kitkän keşelär lagerenda urnaşqan mäçetkä dron höcüme yasap, 75 keşene1 ğomeren özä. Bu xaqta älege urında êşläwçe yärdäm oyışması xäbär itä.
Höcüm comğa könne “Operativ yärdäm köçläre”neñ armiyäne Darfur töbägeneñ töp şähäre Äl-Faşirdan çığaru öçen xäräkät başlağan waqıtta bula. Abu Şuk lagerendäge aşığıç yärdäm törkeme mäğlümatlarına kürä, dron mäçetkä höcüm itkän.
"Mäçet cimerekläre astınnan mäyetlär çığarıldı," dip belderde törkem.
Şul uq waqıtta, yasalma iyärçennän alınğan räsemnär “Operativ yärdäm köçläre”neñ Äl-Faşirda uñışqa ireşüen kürsätä. Soñğı 18 ayda Äl-Faşir paramilitar törkem qamawında bulğan.
Sudan armiyäse Äl-Faşirda könbatıştağı pozitsiyälärgä tuplanğan häm 2023 yılnıñ aprelennän birle “Operativ yärdäm köçläre” belän awır suğışta.
Açlıq kiçerüçe Abu Şuk lagerı
Yêl universitetınıñ gumanitar tikşerenülär laboratoriyäse analizlağan yasalma iyärçen räsemnäre “Operativ yärdäm köçläre”neñ strategik urınnarda alğa baruın kürsätä, şul isäptä,n Äl-Faşirnıñ könbatışında urnaşqan êlekke UNAMID bazasında. Bu baza qayçandır BMO- Afrika Berlege missiyäseneke bula, xäzer armiyä tarafdarları - Urtaq Köçlärneñ ştabı bularaq qullanıla.
Yêl, duşämbe häm pänceşämbe könnärendä alınğan yasalma iyärçen räsemnären analizlağannan soñ: “Operativ yärdäm köçläre” êlekkege UNAMID kompleksın, Urtaq Köçlärneñ operatsiyä bazasın üz kontrolenä alğan şikelle kürenä" dip belderä.
“Operativ yärdäm köçläre” räsmie, isemen äytmäw şartı belän, mondıy mäğlümat citkerä: "Pänceşämbe könne säğat 14:00 tiräsendä bezneñ köçlär UNAMID bazasın tulısınça üz kontrolenä aldı”.
“Operativ yärdäm köçläre” suğışçıları xäzer açlıq kiçerüçe Abu Şuk lagerınıñ küp öleşen kontrol itä, bu lager UNAMIDtan öç kilometr tönyaqta urnaşqan, dip xäbär itä waqıyğa şahitları.
Bu xäl armiyäneñ UNAMID bazasınnan öç kilometr könyaqta urnaşqan operatsiyälär bazası bulğan Äl-Faşer aêroportın häm kompleksnıñ biş kilometr könçığışında urnaşqan 6nçı diviziya ştabın turıdan-turı “Operativ yärdäm köçläre” utı astına quyğan.
