Törkiyä Cömhüriyätneñ 102 yıllığın kütärenke rux belän qotlağanda İlbaşı Räcäp Tayyip Ärdoğan berdämlek, teläktäşlek häm alğarış çaqıruın yasadı. Ärdoğan ileneñ “Törkiyä ğasırı” vizionı qısalarında “köçle häm çäçäk atuçı Törkiyä”ne tözü täwäkkällegenä basım yasadı.

İlbaşı Ärdoğan çärşämbe könne bastırğan yullamasında ildäge häm çit illärdäge watandaşlarnı, Kipr töreklären häm “şatlıqların urtaqlaşuçı böten duslarnı” täbrik itte. Ärdoğan: “Bu ğorurlı köndä 86 million watandaşıbıznıñ, Kipr törek xalqınıñ häm çit ildä yäşäwçe qardäşlärebezneñ härbersen çın küñeldän qotlıym, - dide häm - Bu cirlärne qannarı häm cannarı belän watan itkän qaharmannarıbıznı Allahınıñ yarlıqawı häm räxmät belän iskä alam”, - dip östäde.

Ärdoğan Cömhüriyätkä nigez saluçı Mostafa Kemal Atatörek häm bäysezlek suğışın citäklägän Törkiyä Böyek Millät Mäclese äğzalärenä dä xörmätlären citkerde.

“Köçle millät, tirän tamırlı ğoref-ğädätlär”

İlbaşı Törkiyäneñ häm köçle millät häm dä tirän tamırlı ğoref-ğädätlärgä iyä däwlät buluın belderde häm ilneñ berdämlegen häm suverenlığın saqlaw täwäkkällegenä basım yasadı.

Ärdoğan “Törkiyä ğasırı” vizionı qısalarında saqlanu, iqtisad, ênergetika häm diplomatiya belän bergä här ölkädä iniśiativalar yasaluın häm “böyek, köçle häm çäçäk atuçı Törkiyä”ne tözüne däwam itäçäklären iskärtep uzdı.

Däwlät başlığı monnan tış 2023nçe yılnıñ fevral ayındağı cirteträwlärdä zarar kürgän töbäklärneñ yañadan tözekländerelüe qısalarında xökümätneñ yıl axırına qädär 453 meñ yaña toraq tapşırunı maqsat itüen belderde.

İlbaşı Törkiyäneñ tınıçlıqqa häm totrıqlılıqqa omıtılışın tağın ber qat raslap, ilneñ terrorsız Törkiyä maqsatına taba adım adım alğa baruın häm global bäreleşlärdä, şul isäptän Ğazzä belän Fälästindä ğädellekne häm keşelekne yaqlarğa däwam itüen belderde.

Ärdoğan: “Bergäläşep töbägendä lider, dönyada xörmätkä layıq köç bulaçaq böyek, köçle häm çäçäk atuçı Törkiyäne töziyäçäkbez”, diyep, Cömhüriyätneñ 102 yıllığın qotladı.