Awrupa futbolınıñ idarä itü oyışması UEFA İzrailneñ kiläçäktä xalıqara yarışlarda qatnaşuı belän bäyle möhim qarar qabul itü aldında tora. Säyäsi basım arta barğan şartlarda, kiläse atnada İzrailne xalıqara yarışlardan çitläşterü turında aşığıç tawış birü uzarğa mömkin.
Bu mäsälä UEFAnı 2026nçı yılğı Dönya çempionatı uzdıruçılarnıñ berse - AQŞ belän qarşılıqqa quya. Berläşkän Millätlär Oyışması tikşerü komissiyäse İzrailneñ Ğazzädä genotsid qıluı turında beldergännän soñ, sport sanksiyäläre taläpläre köçäyde. Läkin AQŞ xökümäte üz pozitsiyäsen açıq itep belderde.
AQŞ däwlät departamentı wäkile: "Bez İzrailneñ milli futbol komandasınıñ Dönya Kubogınnan çitläşterelüenä qarşı härtörle omtılışnı tuqtatu öçen êşlärgä äzerbez," – dip belderde.
Soñğı atnalarda İzrailne çitläşterü taläpläre kisken arttı. Berläşkän Millätlär Oyışmasınıñ keşe xoquqları belgeçläre FIFA häm UEFAga İzrailne yarışlarda qatnaştırmaw turında möräcäğat itte. İspaniyä xökümäte räise Pedro Sançes 2022 yılda Ukrainağa höcüm itkännän soñ Rusiyägä qarata qullanılğan sanksiyälär kebek ük İzrailgä dä şundıy çaralar kürergä kiräklegen äytte.
"İzrail alğa taba da üzeneñ xalıqara imidjın yaxşırtu öçen härtörle platformanı qullana almıy," – dip belderde Sançes.
Fälästin futbol federatsiyäsecitäkçese Cäbril Räcub ta, şulay uq, turıdan-turı belderü yasadı: "İzrail FIFAnıñ prinsipların, qıymmätlären häm nigeznamäsen bozdı. Şuña kürä, min İzrailgä sanksiyälär kertelergä tiyeş dip sanıym."
UEFA räsmi räweştä bernindi cıyılış planlaştırılmağan dip beldersä dä, yaqın arada tawış birü mömkinlege turında xäbärlär bar. Tik Awrupadan ber wäqalätle: "Añlaşılğança, UEFA citäkçelege bu mäsälädä nindider adım yasaluın teli," – dide. Ul soñğı ber ayda küp illärdän yaña, yuğarı däräcädä basım yasaluın söyli.
Norvegiyä futbol federatsiyäse (NFF) bu mäsäläne qarawnı taläp itkän berläşmälärneñ berse. Anıñ citäkçese UEFA İdarä komitetı äğzası Liz Klêveness gumanitar krizis turında açıq belderülär yasadı.
"Bez dä, başqa oyışmalar da Ğazzä töbägendä tınıç xalıq duçar bulğan keşelek ğazapları häm proporsional' bulmağan höcümnärgä bitaraf qala almıybız," – dip belderde Klêveness.
İzrail 11 oktyaberdä Norvegiyädä, ä öç könnän soñ İtaliyädä Dönya Kubogına saylap alu matçlarında qatnaşırğa tiyeş. İzrail futbol federatsiyäse “Reuters”qa: "Bezgä mondıy çara turında bernindi işarä yuq," – dip belderde.
Tribunalardan da basım arta bara. Gretsiyäneñ “PAOK” komandası belän “Maccabi Tel-Aviv” arasında bulğan Awrupa Ligası matçında tamışaçılar "Genotsidnı tuqtatıgız" häm "İzrailgä qızıl karta kürsätegez" digän plakatlar kütärde, "Fälästin azat bulsın" dip qıçqırdı.
UEFA öçen här törle qarar zur ähämiyätkä iyä, çönki ul sport idaräçelegen global' säyäsi krizis belän qapma-qarşı kiterä.
