Rusiyä Ukraina könçığışındağı Dnepropetrovsk ölkäsenä bäyle Nikopol' şähärendä yabıq bazarğa oyıştırğan dron höcümendä tınıç xalıqtan 5 keşeneñ ğömere özelde, 19 keşe yaralandı.

Cirle prokuratura höcümneñ şimbä könne säğät 09.50dä barlıqqa kilüen açıqladı.

Ölkä gubernatorı Aleksandr Ganja hälaq bulğannar arasında öç xatın-qız häm ike ir-at buluın, yaralanğannar arasındağı 14 yaş'lek qız balanıñ awır xäldä buluın belderde.

Şul uq könne irtänge säğätlärdä front sızığına yaqın urnaşqan Xarkov şähärendä dä 5 keşe yaralandı.

Ukraina hawa köçläre Rusiyäneñ tön buyı 286 dron cibärüen, alardan 260ınıñ täêsirsez xälgä kiterelüen açıqladı.

Tönyaqtağı Sumı töbägendä isä toraq punktlar häm grajdanlıq infrastrukturasına höcümnärdä 11 keşe yaralandı. Qotqaru xezmätläre urtaqlaşqan yazmalarda ber binanıñ öske qatlarınıñ yalqın êçendä qaluın kürep bula.

Dnepropetrovsk ölkäsendä monnan alda oyıştırılğan höcümnärdä isä 5 aylıq bäbi belän 6 yaş'lek bala da aralarında bulğan 3 keşeneñ yaralanuı xäbär itelde.

Rusiyä tarafında isä Ukraina çigenä yaqın Rostov töbägendä oyıştırılğan raketa häm dron höcümendä Taganrog şähärendä 1 keşe hälaq buldı, 4 keşe awır yaralandı.

Ölkä gubernatorı Yuriy Slyussar yaralanğannar arasında öç cirle ğayepsez keşeneñ häm ber çit il keşeseneñ buluın, barlısınıñ da kritik xäldä ikänen äytte.

Azov diñgezendä isä ber çit il yök köymäseneñ kilep töşkän dron kisäkläre arqasında zıyan kürüe häm yanğın çığuı belderelde.

Bu arada Ukraina däwlät başlığı Volodimir Zelenskiy iminlek xezmättäşlege söyläşüläre öçen Törkiyägä kilde.