Ukraina Rusiyäneñ tön buyı ilne "yözlärçä" dron häm raketa belän utqa totuın, kim digändä, 10 keşe yaralanuın belderde. Şul uq waqıtta, kürşe Polşa üz hawa kiñlegen saqlaw öçen oçqıçların kütärgän.
Bu höcümnär Rusiyäneñ NATOnı xärbi ittifaqnıñ hawa kiñlegen bozu turındağı signallarğa tağın da kisken reakśiyä yasawdan tayçınu mäsäläsendä kisätüennän soñ buldı.
Ukraina ilbaşı Volodimir Zelenskiy Kievka AQŞta citeşterelgän, Izraildän alınğan “Patriot” hawa saqlanu sistemasınıñ Rusiyä höcümnärenä qarşı qullanu öçen birelüen açıqladı.
"Rusiyä xalıq yoqlap yatqanda tağın da kiñ külämle hawa höcüme başqardı," - dip yazdı Ukraina tışqı êşlär ministrı Andriy Sibiga yakşämbe könne “X” platformasında.
"Qabat yözlärçä dron häm raketa toraq yortlarnı cimerä, tınıç xalıqqa zıyan kiterä," - dip östäde ul.
Sibiga höcüm näticäsendä küpqatlı yortnıñ täräzälärennän ut çığuın kürsätüçe videoyazmanı da urtaqlaştı.
Köçle höcüm
Kiyev şähäre başlığı Vitaliy Kliçko “Telegram”da Ukraina başqalasınıñ "kiñ külämle" höcüm astında buluın citkerde häm keşelärne sıyınu urınnarında qalırğa çaqırdı.
Ul, kim digändä, altı keşeneñ yaralanuın, şularnıñ bişeseneñ xastaxanädä, berseneñ urında uq yärdäm aluın xäbär itte.
Könyaq-könçığış Zaporoje töbäge gubernatorı Rusiyä höcümnärennän, kim digändä, dürt keşeneñ yaralanuın belderde.
Ukraina ilbaşı idaräse başlığı Andriy Yermak, "Mäskäw tınıç xalıqqa qarşı suğış alıp bara," - dip ğayepläde.
"Bu ğamällärgä cawap bulaçaq. Ämma Könbatışnıñ Rusiyägä iqtisadi basımı da köçäytelergä tiyeş," - dip östäde Yermak.
Polşa qorallı köçläre “X” platformasında üz hawa kiñlegen saqlaw öçen oçqıçlar kütärülären häm cir öste hawa saqlanu sistemasın yuğarı äzerlek xälenä kiterülären xäbär itte.
Bu çaralar profilaktika räweşendä, Polşa hawa kiñlegen häm, bigräk tä, Ukrainağa yaqın töbäklärdä xalıqnı saqlaw maqsatında başqarılğan.
“Ükenäçäklär”
Soñğı atnalarda berniçä Awrupa ile Rusiyäne dronnar häm xärbi oçqıçlar belän üz hawa kiñlegen bozuda ğayepläde, NATO moñı üzeneñ nıqlığın sınaw dip bäyäläde.
Rusiyä bu ğayepläwlärne kire qağa häm NATO illärenä höcüm itärgä niyäte bulmawın belderä.
Nyu-Yorkta BMO ğomum şurasında çığış yasağanda, Rusiyä tışqı êşlär ministrı Sergey Lavrov: "İlemä qarşı teläsä-nindi agressiyägä kisken cawap qaytarılaçaq," - dip belderde.
Jurnalistlar belän söyläşkändä Lavrov: "Ägär kem dä bulsa Rusiyä hawa kiñlegendä bulğan ob'ektlarnı bärep töşersä, monıñ öçen bik nıq ükenäçäk," - dip kisätte.
Nyu-Yorktan qaytqaç, Zelenskiy jurnalistlarğa: "Izraildän alınğan “Patriot” sistemasınıñ Ukraina cirendä êşli başlawın," häm "köz köne tağın ike sistema kiläçägen" xäbär itte.
Başta konfliktqa neytral qaraşta bulğan Izrailneñ Rusiyä belän mönäsäbätläre Mäskäwneñ İran belän yaqınayu häm Ğazzädäge suğışnı tänqıytläwe arqasında suındı.
Şimbä könne Ukraina häm Rusiyä arasında bäreleşlär häm ikeyaqlı hawa höcümnäre däwam itkändä, belgeçlär Awrupanıñ iñ zur Zaporoje atom-töş stansiäseneñ dürt kön buyı çeltärdän ayırılğan buluın häm monıñ atom-töş facıyğase kiterep çığara aluın xäbär itte.
