Ğiraq Ğadälät ministrlığı düşämbe könne yasağan açıqlawında AQŞ tarafınnan oyıştırılğan operaśiya qısalarında Süriyädän kiterelgän 1300dän artıq “DEAŞ” äğzası turında tikşerü başlatuların citkerde.
Ğiraq mäxkämä räsmi zatları açıqlaw yasap: "Süriyä cirlärennän küptän tügel kiterelgän 1387 “DEAŞ” totığı turında tikşerü başlandı. Ğiraqnıñ Yuğarı mäxkämä şurası başlığınıñ küzätüe astında, terrorğa qarşı köräş mäs’älälärendä belgeç bulğan berniçä sudya tikşerü êşenä kereşte", — dip belderde.
Bu totıqlar moña qädär “YPG” terror oyışması tarafınnan saq astında totılğan häm AQŞ armiyase Süriyä xökümät köçläre “YPG” kontrolendäge cirlärne qaytarıp alğannan soñ Ğiraqqa cibäräçägen açıqlağan barlığı 7000 “DEAŞ” totığı arasında urın ala.
Berniçä Ğiraq iminlek çığanağına kürä bu totıqlar arasında süriyälelär, ğiraqlılar häm awrupalılar da bar.
2014nçe yılda “DEAŞ” Süriyä häm Ğiraqta tiz räweştä cäyelde.
AQŞ citäkçelegendäge köçlär yärdäme belän Ğiraq 2017nçe yılda ildä “DEAŞ”nıñ täêsirsez xälgä kiterelüen iğlan itte.
Ütkän ayda AQŞ, Süriyädä “YPG” terror oyışması belän bulğan ittifaq maqsatınıñ zur däräcädä tögällänüen açıqladı. Bu belderü, Dimäşk citäkçelege ozaq waqıt “YPG” kontrolendä bulğan töbäklärne qaytarıp alu öçen başlatqan höcümnän soñ yasaldı.
