“AFP” analizı buyınça, 15-30 iyün arasında Awrupada bulğan êsselek waqıtında awrupalılarnıñ öçtän ike öleşennän artığı 35°C tan yuğarıraq temperatura kiçergän. Rekordlı êsselek dulqınınnan soñ 20 yıldan artıq waqıt ütsä dä, qıytğa êsse hawa torışına caylaşu öçen köräşä kebek.
Awrupada yaqınça 410 million keşe yäşäwçe töbäklär soñğı êsselektän zıyan kürde. Bu san 2003 yılnıñ 1-17 avgustı arasında bulğan rekordlı êsselek waqıtında zıyan kürgän 320 million keşedän küpkä yuğarıraq.
“AFP” üz isäpläwlären Awrupa qorılıq observatoriyäseneñ könlek maksimal' temperatura mäğlümatlarına häm Berläşkän tikşerenü üzägeneñ xalıq sanına nigezlägän.
İyün ayındağı êsselek dulqını waqıtında Pireney yarımutrawınnan Ukrainağa qadär suzılğan, şulay uq, Balkannar häm Germaniyäne üz êçenä alğan territoriyä citdi zıyan kürde. Frantsiyäneñ materik xalqınıñ barısı da diyärlek, İspaniya häm İtaliyanıñ ğomumi xalqınıñ dürttän öç öleşennän artığı ber noqtada 35°C tan yuğarıraq temperatura kiçergän.
“AFP” agentlığınıñ Awrupa observatoriyäse mäğlümatlarına nigezlänep yasagan analizına qarağanda, İspaniyäneñ Kataloniya töbägendäge Lleyda şähäre tiräsendä temperatura, kim digändä, 16 kön rättän 35°C tan artıp kitkän.
