Ärdoğan AQŞ ilbaşı Donald Tramp belän uzğan söyläşüneñ Törkiyä-AQŞ mönäsäbätlärendä borılış noqtası buluın; F-35 xärbi oçqıç programması, CAATSA sankŝiyalären beterü häm yañartılğan saqlanu xezmättäşlek mäs’älälärendä alğarışnıñ buluın äytte.
Törkiyä ilbaşı Räcäp Tayyip Ärdoğan Törkiyä belän Amerika Quşma Ştatlarınıñ saqlanu, säwdä häm regional totrıqlılıq mäs’älälärenä yünälgän yuğarı däräcäle söyläşülärdän soñ mönäsäbätlärdä yaña häm uñay çornıñ başlanuın belderde.
Çärşämbe könne Azärbaycannan qaytqanda oçqıçta jurnalistlarğa belderü yasağan ilbaşı AQŞka yasağan soñğı säfäreneñ häm annarı Tramp belän ütkärgän telefon söyläşüläreneñ soñğı yıllarda ike yaqlı mönäsäbätlärdä kürelgän problemalı mäs’älälärdä täşwik itüçe işarätlär birüen açıqladı.
F-35 programmasınıñ häm CAATSA sankŝiyaläreneñ qaraluın häm Tramptan konstruktiv yullamalar aluların äytkän Ärdoğan bolay dip däwam itte: “Törkiyä bu proyektta partnyer, aqçasın tülägän häm yöklämälären ütägän il. Bezne bu programmadan çığaruçı nigeznamälärneñ legallege yuq. Bu barışlarnıñ qısqa waqıtta uñay näticälänüen telibez. Törkiyä-AQŞ mönäsäbätlärendä yaña çor başlandı.”
Törkiyäneñ Ğazzädä utnı tuqtatudağı role
Törkiyä ilbaşı Räcäp Tayyip Ärdoğan Ğazzä häm Süriyädäge wazğıyät belän ber rättän regional krizislarğa tuqtalıp, Törkiyäneñ diplomatiya häm iminlek koordinaŝiyaseneñ iñ yuğarı däräcädä däwam itüen äytte.
Änkara citäkçelegeneñ AQŞ, Misır häm “Xamas” belän däwamlı êlemtädä buluın häm Törkiyäneñ küzläw başlığınıñ Şarm-äş-Şäyxtä baruçı söyläşülärdä qatnaşuın belderde.
