Törkiyäneñ säwdä ministrı Ömär Bolat Afrikağa qaraşlarınıñ tuğanlıq, ğadellek häm tiñlek nigezendä, ike yaqlı xörmät häm tabış prinŝipları belän tuuın belderep: “Oçraşuıbıznıñ maqsatı – global iqtisadi bilgesezlektä bergä atlaw, dönyaküläm köç kürsätülärgä qarşı köçlärne berläşterü, Törkiyä-Afrika partnyerlığın nığıtu,” – dide.

Säwdä ministrlığı räislegendä, Afrika berlege koordinaŝiyasendä häm Tışqı iqtisadi mönäsäbätlär şurası yärdäme belän oyıştırılğan Törkiyä-Afrika êş häm iqtisad forumı İstanbuldağı Kongress üzägendä däwam itä.

“Anadolu” agentlığı global êlemtä partnyerı bulğan häm “Törkiyä-Afrika mönäsäbätlären nığıtıp, urtaq tabışlarnı büleşüe” teması belän oyıştırılğan forum qısalarında “Törkiyä-Afrika êş häm iqtisad forumı” urtaq beldergese açıqlandı.

Mäs’älä belän bäyle uzğan cıyılışta çığış yasağan Säwdä ministrı Ömär Bolat bügen başlanğan häm irtägä azağına yaqınlaşaçaq zur cıyılışqa 27 Afrika ilennän häm 4 regional oyışmadan barlığı 28 ministr, şaqtıy ministr urınbasarı, yuğarı däräcäle wäkil häm 4 meñ tiräse Afrikalı häm törek êşmäkärneñ kilüen açıqladı.

Räsmi utırışlar belän ber rättän küp kenä ölkädä panel, kürgäzmä häm söyläşüneñ ütkärelüen citkergän ministr: “Törkiyä-Afrika êş häm iqtisad forumı” Törkiyä belän Afrika arasındağı säwdä häm iqtisad ölkälärendäge mönäsäbätlärne üsterüne häm Afrikanıñ üsüenä öleş kertüne maqsat itä,” – dide.

Ministr Bolat ike il arasındağı säwdä külämendä häm qalğan tarmaqlarda küzätelgän täraqqıyätlärgä tuqtalıp bolay dide: “Säwdädä, investiŝiyalärdä, podryadçiklıkta, xezmätlär tarmağında, transportta häm ênergetikada Törkiyä-Afrika mönäsäbätläre ğadättän tış alğarış kürsätte. 2003 yılda Törkiyäneñ Afrika belän 5 milliard 400 million dollar bulğan tışqı säwdäse uzğan yılnı 37 milliard dollarğa kütärelde. Bıyıl 40 milliard dollar buluın farazlıybız. Afrika qıytğası milliard yarımnan artıq xalıq sanı belän 2050 yılda dönyadağı xalıq sanınıñ dürttän ber öleşen täşkil itäçäk. Afrika bay resursları, êçke bazarı häm yäş xalqı belän dönyanıñ monnan soñğı iqtisadi üseşeneñ lokomotivına äylänäçäk. Törkiyä Cömhüriyäte bularaq Afrikağa qaraşıbız qıytğa illäre belän tuğanlıq, ğadellek häm tiñlek nigezendä, ike yaqlı xörmät häm tabış prinŝipları belän barlıqqa kilä.”

Afrika berlegeneñ iqtisadi üseş, säwdä, turizm, sänägät häm taw sänägäte komissarı Franŝiska Taçup Belob ta üzgärüçe global bäyläneş qısalarında oyıştırılğan forumnıñ bik möhim buluın äytte.

“Bıyıl “Törkiyä-Afrika êş häm iqtisad forumı”nıñ bişençese oyıştırıla. Törkiyädän Afrikağa turıdan investiŝiyalärne tağın da arttırırğa telibez. İke il arasında säwdä küläme 40 milliard dollardan arttı,” – dide ul.

“Törkiyä-Afrika êş häm iqtisad forumı” urtaq beldergese açıqlandı.

Beldergedä xäzerge global iqtisadi bilgesezlek şartlarında oyıştırılğan çaranıñ Törkiyä häm Afrika arasında çıdam, kiñ qırlı häm transformativ iqtisadi partnyerlıklar qorunıñ ähämiyäten assızıqlawı citkerelde.

Urtaq beldergegä kürä forum iqtisadi üzgäreş, sänägätläşü häm regional integraŝiya mäs’älälärendä urtaq vizionğa basım yasap, Afrika berlegeneñ “Kön tärtibe 2063” häm BMOnıñ “Daimi üseş kön tärtibe 2030”ğa bulğan bäylelegen qabat rasladı.

“Törkiyä-Afrika êş häm iqtisad forumı”nıñ 6nçısı 2027 yılda oyıştırılaçaq.