Awrupa komissiyase räise Ursula fon der Lyayen düşämbe könne AQŞ, Qatar, Misır häm Törkiyä aradaşçılığında tözelgän tınıçlıq kileşüenä Awrupa Berlegeneñ tulı yaqlaw kürsätüen belderde.
“Awrupa AQŞ, Qatar, Misır häm Törkiyä aradaşçılığında tözelgän tınıçlıq planın tulısınça yaqlıy. Bügen Şarm äş-Şäyxtä suğışnı tuqtatu kileşüeneñ tämamlanuı tarixta möhim borılış bulaçaq,” - dip belderde fon der Lyayen AQŞnıñ X platformasında.
Ul Fälästin xakimiyäteneñ citäkçelek häm reformaların yaqlap, bu planğa üzläreneñ barlıq mömkinleklär belän yärdäm itärgä äzer buluların assızıqladı.
“Bez Fälästin donorları törkemendä aktiv rol uynayaçaqbız. Şulay uq Ğazzäne torğızu öçen Awrupa Berlege finans yärdäme kürsätäçäk,” - dip östäde fon der Lyayen.
Trampnıñ planı
AQŞ ilbaşı Donald Tramp çärşämbe könne İzrail häm Fälästin törkeme “Xamas” arasında tınıçlıq kileşüen tormışqa aşıru öçen 20 punktlı plannıñ berençe êtabı belän bäyle kileşü tözelüen citkerde.
Plan barlıq İzrail äsirlären 2000 tiräse Fälästin totığına almaşu häm İzrail köçläreneñ töbäktän äkrenläp çigenüen üz êçenä ala.
Plannıñ berençe êtabı comğa könne ğamälgä kerde.
İkençe êtabı “Xamas” qatnaşınnan başqa yaña citäkçelek organın buldıru, Ğazzädä xalıqara köçlär urnaştıru häm “Xamas”nı qoralsızlandırunı küzdä tota.
2023 yılnıñ oktäbrennän birle İzrail höcümnärendä Ğazzädä kübese xatın-qızlar häm balalar bulğan 67 meñ 800dän artıq fälästinle ülde, töbäk yäşäw öçen yaraqsız xälgä kilde.
