Rusiya ilbaşınıñ iq’tisadi êşlärdän cawaplı maxsus wäkile Kirill Dmitriyev, Mäskäw belän Vaşingtonnıñ Bering buğazı astınnan tunnel’ tözep, ike ilne ber-bersenä totaştıru turında söyläşülär başlawın citkerde.

Dmitriyev comğa könne X platformasında “Tunnel’ turında söyläşülär başlandı” dip yazdı.

Ul şulay uq Rusiyäneñ turıdan-turı investiśiyälär fondı başlığı da bulıp tora.

AQŞ ilbaşı Donal’d Tramp, comğa könne könne Aq Yortta Ukraina ilbaşı Volodimir Zelenskiy belän ütkärgän oçraşuda, Rusiya belän AQŞnı timer yul transportı aşa totaştıraçaq Bering buğazı astındağı tunnel’ proyektın qızıqlı dip bäyäläde.

Dmitriyev äytüençä, zamança tunnel’ tözeleşe yaqınça 8 yılda  tämamlanırğa mömkin häm anıñ bäyäse 8 milliard dollardan kim bulaçaq.

Bu isä AQŞ milliarderı İlon Masknıqı bulğan “The Boring Company” texnologiyäläre yärdämendä mömkin.  

Älege summa xäzerge bäyäse 65 milliard dollar dip farazlanğan bäyädän küpkä tübän.

Proyektqa “Putin–Tramp tunnele” isemen birgän Dmitriyev anıñ urtaq çığanaqlar buldırı, êş urınnarı tudıru häm iq’tisadi üseş potenśialına iğ’tibar yünältte.

Ul şulay uq Rusiya turıdan-turı investiśiyälär fondınıñ Rusiya belän Qıtay arasında çik ar’yağı aşa timer yul küperläre tözüdä bulğan kebek bu mäs’älädä dä  täcribäse buluın  iskärtep uzdı.