AQŞ ilbaşı Donald Tramp, Rusiyä belän Ukraina arasındağı suğış xäl itelmägän oçraqta, Ukrainaga “Tomagavk” raketaları biräçägen belderde.

Tramp yakşämbe könne, Şarm äl-Şäyextä uzaçaq Ğazzä tınıçlıq kileşüe sammitına kitär aldınnan, Ukrainağa "Tomagavklar kiräk" dip äytte.

“Bez bu xaqta söyläştek häm anı qarayaçaqbız,” dip ul Ukraina däwlät başlığı Volodimir Zelenskiy belän söyläşülärenä işarä yasadı.

“Minem, döresen äytkändä, Rusiyä belän söyläşüem kiräk bulırğa mömkin. Alar “Tomagavk”larnıñ ul yünäleştä cibärelüen telime? Minemçä, yuq. Minem Rusiyä belän bu xaqta söyläşüem mömkin,” dip ul Zelenskiy belän söyläşkän süzlären citkerde häm “Tomagavk”lar turında “yaña agressiya adımı” dip äytte.

Ul: “Qarağız, ägär bu suğış xäl itelmäsä, min alarga “Tomagavk”lar cibäräçäkmen. Şunı äytä alam, “Tomagavk” – iñ ışanıçlı qorallardan berse, bik agressiv qorallar. Häm döresen äytkändä, Rusiyägä bu kiräkmi... Ägär suğış xäl itelmäsä, bez monı êşli alabız,” dip östäde.

“Min suğışnıñ xäl itelüen kürergä telim,” dide AQŞ liderı.

Anıñ bu süzläre Zelenskiynıñ yakşämbe könne Trampnıñ Ğazzä tınıçlıq kileşüe planı turında “şundıy uq yul belän Rusiya-Ukraina suğışın da xäl itep bula” dip äytkännän soñ yañğıradı.

Zelenskiy, şulay uq, ike ilneñ AQŞtan Kievqa ozın aralarğa atuçı “Tomagavk” raketaların cibärü mäsäläsendä êşçänlek alıp baruın da belderde.

Uzğan düşämbe könne Tramp Kievqa “Tomagavk”lar cibärü turında qarar qabul itügä yaqın buluın äytte häm alarnıñ niçek faydalanıluın, qaya cibärelüen belergä teläwen östäde.