YUNESKO törki tellärdä söyläşüçe däwlätlärneñ urtaq tele, mädäniyäte häm dokumental mirasın täşwik itü maqsatı belän 15 dekabr könen "Xalıqara törki tellär ğailäse köne" itep iğlan itte.

Üzbäkstannıñ tarixi şähäre Samarqandta Törkiyä ilbaşı Räcäp Tayyip Ärdoğan täqdim itkän 15 dekabrneñ "Xalıqara törki tellär ğailäse köne" itep iğlan itü turındağı qarar ölgese YUNESKOnıñ 43nçe ğomum konferenśiyasendä tikşerelde häm qabul itelde. Bu konferenśiya 30 oktäbrdä 194 ildän 5 meñnän artıq keşe qatnaşında başlandı.

“YUNESKO tüşäme astında cıyılğan Azärbaycan, Qazaqstan, Qırğızstan häm Üzbäkstan kebek barlıq törki däwlätlärgä tellär ğailäsen qotlaw, tanıtu häm qäderläw maqsatı belän bu ölgene täqdim itkännäre öçen zur räxmät. Şulay uq Başqarma şurası êşçänlekläre waqıtında yärdäm kürsätkän 26 sponsor däwlätkä, şul isäptän tuğandaş däwlät Törekmänstanğa çın küñeldän räxmät belderäbez,” – dip belderde Törkiyäneñ YUNESKOdağı daimi wäkile Gölnur Aybät.

Aybät tellärneñ aralaşu çarası ğına tügel, şul uq waqıtta śivilizatsiyalärneñ ruxı buluın, buınnar aşa urtaq xäter, aqıl häm şäxeslekne citkerüen bilgeläp ütte.

Ul törki tellärneñ kiñ geografiyädä 200 millionnan artıq keşe tarafınnan söyläşelüen, alarnıñ ğasırlar buyı urtaq tarix belän qimmätlär aşa bay mädäni mozaika barlıqqa kiterüen assızıqladı.

“15 dekabr – 8nçe ğasırğa qarawçı törki telneñ iñ borıñğı yazma dokumentları bulğan Orxon yazmaları açıp salınğan kön. Bu kön törki śivilizatsiyälärneñ urtaq mädäni häm sänğät baylıqların simvol'aştırıp, xalıqlar arasında mädäni yaqınayu häm dialognı täşwik itä. "Xalıqara törki tellär ğailäse köne"n tanıp, YUNESKO bu waqıyğa belän küptellelek, mädäni törlelek häm xalıqlar arasında dialognı yaqlawğa üzeneñ daimi täwäkkällegen tağın ber tapqır raslıy,” – dip östäde wäkil.

Änkara bu qararnı xuplıy

Törkiyä YUNESKOnıñ bu qararın xupladı.

“Törkiyä häm tuğandaş törki däwlätlär tarafınnan äzerlängän bu qarar törki dönyanıñ urtaq mirası bulğan törki telne saqlaw häm kiläçäk buınnarğa tapşıru tırışlıqların tağın da nığıtaçaq,” – dip belderde Törkiyä tışqı êşlär ministrlığı düşämbe könne.

Ministrlıq şulay uq yaqınlaşuçı "Xalıqara törki tellär ğailäse köne" uñayınnan törki dönyanı häm törki tellärdä söyläşüçe yäisä öyränüçe duslarnı täbrik itte.

YUNESKOnıñ 43 ğomum konferenśiyase 13 noyabrgä qadär baraçaq.