Hindstan poliśiyäse xäbär itüençä, ildäñ kön’yağında motośikl belän bärelgännän soñ yulçı avtobusına ut qabu säbäple kim digändä 25 keşe ülgän, berniçäse yaralanğan.
Yuğarı däräcäle poliśiya wäqalätlese Vikrant Patil äytüençä, yangın comğa irtäsendä Andhra - Pradeş ştatınıñ Kurnool töbäge tiräsendäge avtoyulda zur tizlek belän baruçı avtobusnı berniçä minutta çolğap ala häm distälägän yulçı avtobustan çığa almıy.
Patil süzlärençä, qayber yulçılar täräzälärne watıp avtobustan sikerälär häm ciñelçä yaralanıp isän qalalar, läkin qalğannarı yärdäm kilgänçe yanıp ülä.
44 yulçısı bulğan avtobus Telangana ştatındağı Haydarabad belän Karnataka ştatındağı Bengaluru şähärläre arasında säyäxät itkän.
Patil beldergänçä, motośikl zur tizlek belän baruçı avtobusqa arttan kilep bärelä, anıñ astında qısılıp qala, avtobus anı beraz österäp bara, şul waqıtta avtobusnıñ yağulıq deposına ut qaba.
Töten çığa başlağaç yörtüçe avtobusnı tuqtata, yanğın sündergeç belän utnı sünderergä tırışa, läkin ul şulqadär köçle bula ki, utnı kontrol’ astına ala almıylar.
Yulçılarnıñ kübese yoqlağan bula, avtobus tulısınça yanıp betä, motośikl yörtüçe dä hälaq bula.
Medêkspertiza törkeme waqıyğa belän bätyle tikşerü alıp bara.
Hindstan prem’yer-ministr Narendra Modi belän Andhra - Pradeş prem’yer-ministrı N. Chandrababu Naydu qazada hälaq buluçılarnıñ ğailäläreneñ qayğısın urtaqlaşqan.
Bu faciğa — Hindstanda ike atna êçendä bulğan ikençe oxşaş waqıyğa.
Ay başında Hindstannıñ tön’yagındağı Racasthan ştatında da yulçı avtobusında yangın çıqqan häm kim digändä 20 keşe hälaq bulğan ide.
