Ukraina ilbaşı Volodimir Zelenskiy comğa könne xärbi küzläw başlığı Kirilo Budanovnı ilbaşı apparatınıñ yaña räise itep bilgeläde. Bu qarar noyabrda anıñ êlekkege yärdämçese korrupsiya skandalı arqasında wazıyfasın taşlağannan soñ çığarıldı.
39 yäşlek Budanov, 2022nçe yılda suğış başlanğannan birle, Rusiyägä qarşı berniçä qıyu häm risklı operatsiyälärne başkaruı belän tanıldı.
'Min Kirilo Budanov belän oçraştım häm anı Ukraina ilbaşı apparatı başlığı wazıyfasına täqdim ittem,' dip yazdı Zelenskiy sotsial' çeltärdä.
Bu bilgeläw yaqınça dürt yıl baruçı suğışnıñ möhim ber waqıtına turı kilä: Zelenskiy çärşämbe könne konfliktnı tämamlarğa kertelgän AQŞ aradaşçılığındağı kileşüneñ “90 protsent”qa äzer buluın iğʿlan itte.
“Bu waqıtta Ukrainaga iminlek mäs'älälärenä, Ukraina saqlanu häm iminlek köçläreneñ üseşenä, şulay uq, söyläşülärneñ diplomatik yünäleşenä kübräk iğtibar kiräk,' dip äytte Zelenskiy.
“Kirilonıñ bu ölkälärdä maxsus täcribäse häm näticägä ireşü öçen citärlek köçe bar,” dip östäde ul.
Budanov täqdimne qabul itüen häm “Ukrainaga alğa taba da xezmät itäçägen” citkerde.
“Ukraina öçen bu tarixi waqıtta däwlätebezneñ strategik iminlege belän bäyle kritik ähämiyätkä iyä mäs'älälärgä iğtibar itü minem öçen zur abruy häm cawaplılıq,”- dip yazdı ul “Telegram”da.
Anı räsmi räweştä ilbaşı apparatınıñ başlığı itep bilgeläw protseduraları başlatıldı, dip açıqladı Zelenskiynıñ kiñäşçese Dmitro Litvin jurnalistlarga.
Räsmi räweştä bilgelängännän soñ Budanov noyabr' ayında zur korrupsiya tikşerüe qısalarında tikşerüçelär öyenä basqın yasağannan soñ wazıyfasınnan kitkän Andriy Yermaknıñ urının alaçaq.
Yermak Zelenskiynıñ iñ yaqın berlektäşlärennän berse bulsa da, Kiyevta ul bäxäsle figura ide. Opponentları anıñ zur köç cıyuın, ilbaşı belän oçraşularnı kontrol' itüen häm tänqıyt’ süzlären räximsez räweştä çikläwen äytä.
Bu dürt yıl baruçı konflikt İkençe Bötendönya suğışınnan soñ Awrupa cirlegendä iñ qanlı bäreleş, ul distälärçä meñ keşeneñ ülemenä häm Ukraina territoriyäseneñ zur öleşeneñ cimerelüenä kiterde.
