AQŞ xärbiläre şimbä könne İzrailgä kilep citte, Ğazzädä tınıçlıq kileşüen tormışqa aşıru öçen xalıqara törkemgä quşıldı, dip xäbär itä AQŞ matbuğatı.
“ABC News” ike AQŞ räsmie süzlärenä tayanıp, yaqınça 200 amerika xezmätkäreneñ tınıçlıq kileşüen küzätü öçen koordinaśiya üzäge buldırırğa cibärelüen belderä. Bu törkem logistika, iminlek, transport, planlaştıru häm injenerlıq ölkälärendä êş alıp baraçaq.
Xäbärgä qarağanda, AQŞ köçläre İzrail cirendä qalaçaq häm Ğazzägä kermäyäçäk. Alar wazıyfaların AQŞ Üzäk Komandalığı (CENTCOM) citäkçese admiral Bredli Kuper qul astında häm töbäk illärennän qatnaşuçı törkemnär belän bergä başqaraçaq.
Trampnıñ 20 punktlı planı
Bu xärbi cibärü AQŞ ilbaşı Donald Trampnıñ çärşämbe könne İzrail häm “Xamas”nıñ 29 sentyabrdä täqdim itelgän 20 punktlı planınıñ berençe êtabın qabul itüen belderüennän soñ başqarıldı.
Kileşü nigezendä, “Xamas” qalğan İzrail totqınnarın azat itäçäk, ä İzrail yaqınça 2,000 Fälästin totqının irekkä çığaraçaq häm üz köçlären äkrenläp Ğazzä cirennän çığaraçaq.
İkençe êtapta Ğazzädä “Xamas” qatnaşmağan yaña idarä mexanizmnı buldıru, urtaq fälästin-möselman iminlek köçlären tözü häm “Xamas”nı qoralsızlandıru qaralğan.
2023 yılnıñ oktyabrennän birle İzrail höcümnäre yaqınça 67,200 fälästinlene, kübese xatın-qızlar häm balalarnı, üterde häm Ğazzäne yäşäw öçen yaraqsız xälgä kiterde.
